నిధి నిక్షేపాల కోసం కామవరపుకోట బావిలో వేట

By Srinivas

Published: Thursday, July 28, 2011, 18:07 [IST]

కేరళ రాష్ట్రంలోని తిరువనంతపురం శ్రీ అనంత పద్మనాభ స్వామి ఆలయంలో లక్షల కోట్ల విలువైన సంపద బయట పడటంతో ఇప్పుడు అందరి దృష్టి ఆలయాలపై పడింది. ఏ పురాతన ఆలయంలో ఎంతెంత ఆస్తులు ఉన్నాయో అని చర్చించుకుంటున్నారు. కేరళ అనంత పద్మనాభ స్వామి ఆలయంలో భారీగా గుప్త నిధులు ఉన్నాయని వార్తలు రాగానే మన రాష్ట్రంలోని అనంతపద్మనాభ స్వామి ఆలయంలో భారీగానే గుప్త నిధులు ఉన్నాయనే అనుమానాలు వ్యక్తమయ్యాయి. తాజాగా పశ్చిమ గోదావరి జిల్లాలోని కామవరపుకోటలోని శివ సహిత వీరభద్ర స్వామి ఆలయంలోనూ, అక్కడి భారీ కోట ప్రాంతంలోనూ భారీగా నిధులు ఉన్నట్లు పలువురు అనుమానాలు వ్యక్తం చేస్తున్నారు. కామవరపు కోట గ్రామాన్ని చోళరాజులు పాలించారు.

వారు పాలించిన కాలంలో అక్కడి శివాలయంలో భారీగా నిధులు భద్రపరిచినట్లుగా వాదనలు వినిపిస్తున్నాయి. కోట చుట్టూ కూడా అపార నిధులు ఉన్నాయని అనుమానాలు వ్యక్తమవుతున్నాయి. కోట ప్రాంగణంలోని పొలాల్లోనూ భారీగానే నిధులు ఉండవచ్చని భావిస్తున్నారు. గతంలో పలుమార్లు పొలాల్లో నిధులు దొరికిన సందర్భాలు ఉన్నాయంట. ఓసారి కోట ప్రాంతంలోని ఓ పొలాన్ని ఓ రైతు కౌలుకు తీసుకొని వ్యవసాయం చేశాడు. సదరు కౌలు రైతుకు ఆ పొలంలో లంకె బిందెలు దొరికాయని, వాటిని ఆ రైతు తీసుకున్న రెండేళ్లలో ఆ కుటుంబంలోని ఆరుగురు మరణించారనేది గ్రామస్తుల వాదన. అంతేకాదు మరో రైతు కుటుంబానికి ఇలాంటి ఘటనే ఎదురయిందంట.

అయితే తమ తమ పొలాల్లో నిధులు ఉన్నాయని చెప్పేందుకు ఎవరు కూడా ముందుకు రావడానికి సిద్ధంగా లేరని తెలుస్తోంది. కోట ప్రాంతంలోని దేవాలయంలో ఎల్ ఆకారంలో ఓ బావి ఉంది. ఆ బావిలో కూడా అపార నిధి నిక్షేపాలు ఉన్నాయని తెలుస్తోంది. నిధులలో రాజనిధి, దైవ నిధి, స్వార్థ నిధి మూడు రకాలుగా ఉంటుందని అందులో దైవ నిధిని ఎవరూ ముట్టకూడదని ముడితే అరిష్టమని అక్కడి వారు అభిప్రాయపడుతున్నారు. ఆర్కియాలజిస్టులు గుడిలో, బావిలో పరిశోధనలు చేయాలని పలువురు సూచిస్తున్నారు.

Published On July 28, 2011