హసన్ అలీకి హైదరాబాద్‌‌తో లింక్స్

పెద్ద మొత్తంలో డబ్బులను అక్రమంగా విదేశీ బ్యాంకులకు తరలించినట్లు ఆరోపణలు ఎదుర్కుంటున్న పూణే వ్యాపారి హసన్ అలీ ఖాన్‌కు హైదరాబాదుతోనూ సంబంధాలున్నాయి. హైదరాబాదుతో అతనికి గల సంబంధాలపై ఆంధ్రప్రదేశ్ పోలీసులు ఆరా తీస్తున్నట్లు వార్తలు వస్తున్నాయి. హైదరాబాదుతో హసన్ అలీకి సంబంధాలపై దర్యాప్తు చేయాలని హైదరాబాదుకు చెందిన ఎన్‌ఫోర్స్‌మెంట్ డైరెక్టరేట్ బృందానికి ఏ విధమైన ఆదేశాలు అందలేదని తెలుస్తోంది. హైదరాబాదులో అతని కార్యకలాపాలు ఏమైనా ఉన్నాయా అనే దృష్టి కోణం నుంచి వారేమీ పని చేయడం లేదు. అయితే, హైదరాబాదులోని అతని గత సంబంధాలపై ఆరా తీస్తూ ప్రస్తుతం ఎవరితోనైనా సంబంధాలు కొనసాగిస్తున్నాడా అనే విషయంపై పోలీసులు దృష్టి పెట్టినట్లు తెలుస్తోంది.

హసన్ అలీ ఖాన్ హైదరాబాదులోనే పుట్టి పెరిగాడు. ఇక్కడే పెరిగాడు. అతని కెరీర్ కూడా ఇక్కడే ప్రారంభమైనట్లు చెబుతారు. హైదరాబాదులోని ముషీరాబాద్‌లో నివాసం ఉండే సుభానీ నవాబ్ ఆరుగురు కుమారుల్లో హసన్ అలీ ఒక్కడు. ట్రిక్‌స్టర్‌గా, బ్యాంక్ స్కామ్‌స్టర్‌గా, హవాలా ఆపరేటర్‌గా, అంతర్జాతీయ మనీ లాండరింగ్ రాకటీర్‌గా అతను పేరు మోశాడు. అయితే, హసన్ అలీ కార్యకలాపాలపై హైదరాబాదు నగర పోలీసులు ఎప్పుడూ దృష్టి సారించలేదని సమాచారం. అతనిపై కనీసం డజన్ కేసులు నమోదై ఉన్నాయి. వాటి దర్యాప్తుపై పోలీసులు ఎప్పుడూ దృష్టి పెట్టలేదు.

హసన్ అలీ మాజీ భార్య మహబూబ్ ఉన్నీసా అలియాస్ షాహిన్‌షా, అతని కుమారుడు సమీ ఖాన్ హైదరాబాదులోని బంజారాహిల్స్‌లో నివాసం ఉంటున్నారు. వీరితో హసన్ అలీ సంబంధాలు కొనసాగిస్తున్నాడా, లేదా అనేది తెలియదు. హసన్ అలీ 1999లో మహబూబ్ ఉన్నీసాకు విడాకులు ఇచ్చాడు. ఖాన్ పూణేలో గుర్రాలకు శిక్షణ ఇచ్చే వ్యక్తి సోదరిని చాలా కాలం క్రితమే పెళ్లి చేసుకున్నాడు. అయితే, ఇటీవలి కాలంలో అతను హైదరాబాదు వచ్చిన దాఖలాలు లేవని అంటున్నారు. తన కుటుంబంతో బంజారాహిల్స్‌లో ఉంటున్నప్పుడు కొందరు అధికారులు, రాజకీయ నాయకులు అతన్ని కలిసేవారని చెబుతారు.

English summary

The state police have begun a probe into businessman Hasan Ali Khan's links with Hyderabad, who has reportedly stashed away billions of dollars in foreign bank accounts.