రేప్‌లు: రసాయన పుంస్త్వ నాశనం పనిచేస్తుందా?

By Pratap

Published: Wednesday, January 2, 2013, 11:32 [IST]

న్యూఢిల్లీ: దేశ రాజధాని ఢిల్లీలో వైద్య విద్యార్థిని సామూహిక అత్యాచార ఘటన ఎన్నో విషయాలను చర్చకు తీసుకుని వచ్చింది. అత్యాచారాలకు పాల్పడే మగవారికి కఠిన శిక్షలు అమలు చేయాలని దేశవ్యాప్తంగా డిమాండ్ వినిపిస్తోంది. రేపిస్టులకు మరణశిక్ష విధించాలనే డిమాండ్‌తో పాటు వారికి రసాయన పుంస్త్వ నాశనం (కెమికల్ కాస్ట్రేషన్) శిక్ష విధించాలనే డిమాండ్ కూడా ముందుకు వచ్చింది. అయితే, రసాయన పుంస్త్వ నాశనం అత్యాచారాలను నిరోధించడానికి పనికి వస్తుందా అనేది ప్రశ్న.

రసాయన పుంస్త్వ నాశనం అంటే ఏమిటి?

కామ వాఛను, లైంగిక చర్యలను తగ్గించడానికి వైద్యం చేయడాన్నే రసాయన పుంస్త్వ నాశనంగా నిపుణులు చెబుతున్నారు. శస్త్రచికిత్స చేసి వృషణాలను లేదా అండాశయాలను తొలగించడం ద్వారా లైంగిక వంధ్యత్వాన్ని తేవడం సర్జికల్ కాస్ట్రేషన్. అయితే, అందుకు భిన్నంగా శరీరంలోకి మందులు ఎక్కించడం ద్వారా వంధ్యత్వానికి గురి చేయడం రసాయన పుంస్త్వ నాశనం. ఇది పూర్తిగా పుంస్త్వాన్ని నాశనం చేయదని, ఇది స్టెరిలైజేషన్ ప్రక్రియ కూడా కాదని అంటున్నారు.

చికిత్సను కొసాగించకపోతే రసాయన పుంస్త్వ నాశనం ప్రక్రియ తిరగబడుతుందని అంటున్నారు. అయితే, బాడీ కెమిస్ట్రీపై శాశ్వత ప్రభావం చూపుతుందని కూడా అంటున్నారు. మానవ హక్కుల కార్యకర్తలు అభ్యంతరాలు చెబుతున్నప్పటికీ, శరీరంపై సైడ్ ఎఫెక్ట్స్ ఉంటాయని అంటున్నప్పటికీ దాన్ని వాడకం అమలులో ఉంది.

కెమికల్ కాస్ట్రేషన్‌ను అమలు చేసే దేశాలు

ఈ ప్రక్రియ 1950 నుంచి అమలులో ఉఁది. అమెరికా దీన్ని అమలు చేస్తుంది. ఇజ్రాయెల్, అర్జెంటీనాలతో పాటు ఐరోపాలోని పలు దేశాలు దీన్ని అమలు చేస్తున్నాయి. కెమికల్ కాస్ట్రేషన్‌కు అనుకూలంగా రష్యా, దక్షిణ కొరియా 2011లో చట్టాలు చేశాయి. కెమికల్ కాస్ట్రేషన్‌ను మొదటిసారి 1944లో నిర్వహించారు. పురుషుల టెస్టోస్టిరోన్ స్థాయిని తగ్గించడానికి డీథైల్‌స్టిబెస్ట్రోల్ వాడారు.

ఇండియాలో కెమికల్ కాస్ట్రేషన్

భారతదేశంలో ఆత్యాచార నిరోధక చట్టం రూపకల్పనలో భాగంగా రేపిస్టులకు 30 ఏళ్ల వరకు జైలు శిక్ష విధించడంతో పాటు కెమికల్ కాస్ట్రేషన్ అమలును సూచిస్తూ ముసాయిదాను సమర్పించారు. వైద్య విద్యార్థిని సామూహిక అత్యాచారం నేపథ్యంలో అత్యాచార నిరోధక చట్టాన్ని మరింత పటిష్టం చేసి, శిక్షను పెంచాలనే ఉద్దేశంలో భాగంగా ఆ సూచనలు వచ్చాయి. సంబంధిత మంత్రిత్వ శాఖ బిల్లును రూపొందించే పనిలో ఉంది. సూచనలను సమీక్షిస్తోంది.

Published On January 2, 2013