పతంగుల పండుగ: గాలిపటాలివే (ఫోటోలు)

By Nageswara Rao

Published: Saturday, January 16, 2016, 11:58 [IST]

హైదరాబాద్: అంతర్జాతీయ పతంగుల పోటీని ఘనంగా నిర్వహించారు. శుక్రవారం ఈ పతంగుల పండుగలో పలువురు సెలబ్రిటీలు పాల్గొన్నారు. వివిధ దేశాలకు చెందిన నిపుణులు ఎగరేసిన రకరకాల పతంగులు కనువిందు చేశాయి. ఇవన్నీ కూడా ఒక్కొక్కటి రూ. వేలతో రూపొందించినవి కావడం విశేషం.

గురువారం ఆగాఖాన్ అకాడమీలో పర్యాటక, గిరిజన సంక్షేమశాఖ మంత్రి ఆజ్మీరా చందూలాల్ పోటీలను ప్రారంభించారు. ఈ సందర్భంగా ఆయన మాట్లాడుతూ అంతర్జాతీయ పతంగుల పోటీలను తొలిసారిగా హైదరాబాద్‌లో నిర్వహించడం గర్వంగా ఉందన్నారు.

గతంలో ఈ పోటీలను గుజరాత్‌లో మాత్రమే నిర్వహించే వారని, హైదరాబాద్‌లో నిర్వహించడం ఇదే తొలిసారి అని ఆయన తెలిపారు. ఈ పోటీలకు వివిధ రాష్ట్రాల నుంచే కాకుండా మలేషియా, టర్కీ, వియాత్నం, ఇండోనేషియాతో సహా ఆరు దేశాల క్రీడాకారులు హాజరయ్యారని ఆయన తెలిపారు.

అదే విధంగా అహ్మదాబాద్, రాజ్‌కోట్, వడదోర, మంగళూరు, నాగ్‌పూర్ పట్టణాల నుంచి కూడా హాజరయ్యారని మంత్రి వివరించారు. పతంగుల పోటీలకు ఎప్పటి నుంచో హైదరాబాద్ నగరం ప్రసిద్ధిగాంచిందని, వీటికి అంతర్జాతీయ పోటీలను హైదరాబాద్‌లోనే ఎందుకు నిర్వహించకూడదని సీఎం కేసీఆర్ సూచించడంతో వీటిని ఈ ఏడాది ఇక్కడ నిర్వహిస్తున్నట్టు ఆయన చెప్పారు.

అనేక క్రీడలకు భవిష్యత్‌లో హైదరాబాద్ అంతర్జాతీయ వేదిక కాబోతుందని మంత్రి అన్నారు. ఐదు అడుగల నుంచి 50 అడుగుల వరకు వంద రకాల పతంగులను క్రీడాకారులు ఎగురవేయడంతో నగర వినువీధుల్లో పతంగులు సంక్రాంతి పండుగకు మరింత శోభను చేకూర్చాయి.