చంద్రబాబు వ్యూహం

వచ్చే ఎన్నికల్లో విజయం సాధించడానికి తెలుగుదేశం పార్టీ అధ్యక్షుడు నారా చంద్రబాబునాయుడు ద్విముఖ వ్యూహం అనుసరిస్తున్నారు. చిరంజీవి ఇమేజ్ ని ఎదుర్కొని తగిన సత్తా చాటడానికి ఆయన ఈ వ్యూహాన్ని ఎంచుకున్నట్లు కనిపిస్తోంది. తెలంగాణ రాష్ట్ర ఏర్పాటుకు అనుకూలంగా తగిన నిర్ణయం తీసుకుని తెలంగాణ రాష్ట్ర సమితి (తెరాస)తో పొత్తు పెట్టుకోవాలనే ఆలోచనలో కూడా ఈ వ్యూహమే ఉంది. తెరాసతో పొత్తు వల్ల మిగతా పార్టీలను ఓడించాలనేది చంద్రబాబు వ్యూహం. ఈ రెండు పార్టీలు కలిస్తే వందకు పైగా సీట్లు వస్తాయని ఒక అంచనా. తెలంగాణలో తెలుగుదేశం పార్టీకి తగిన బలం ఉంది. అంతేకాకుండా ప్రజారాజ్యం అధినేత చిరంజీవి చరిష్మా తెలంగాణలో అంతగా పనిచేయదని కూడా భావిస్తున్నారు. తెరాస, తెలుగుదేశం కలిస్తే మిగతా పార్టీల కన్నా ఎక్కువ ఓట్లు పోలయ్యే అవకాశం ఉన్నట్లు ఆయన ఇదివరకే ఒక అంచనాకు వచ్చారు. అందుకే తెలంగాణపై వీలైనంత త్వరగా తేల్చే ఉద్దేశంతో ఆయన ఉన్నారు. వచ్చే నెల 15వ తేదీ లోగా తెలుగుదేశం పార్టీ తెలంగాణ అంశాన్ని తేల్చే అవకాశం ఉంది. తెలుగుదేశం కోర్ కమిటీ చంద్రబాబుకు సాధ్యమైనంత త్వరలో నివేదిక సమర్పించనుంది. పార్టీ శాసనసభ్యులు, ఎమ్మెల్సీలు, ఇతర నాయకులు తెలంగాణకు అనుకూలంగా అభిప్రాయం వ్యక్తం చేసినందున ఈ విషయంలో జాప్యం చేయకూడదని తెలుగుదేశం పార్టీ భావిస్తోంది. తెరాసతో పొత్తు ప్రజారాజ్యం, కాంగ్రెస్ పార్టీలను మించి సీట్లు సాధించడానికి వీలవుతుందని తెలుగుదేశం పార్టీ అంచనా.

ఇకపోతే, కోస్తా ప్రాంతంలో చిరంజీవి హవాను అడ్డుకోవడానికి తన బావమరిది బాలకృష్ణను చంద్రబాబు ప్రయోగిస్తున్నారు. బాలకృష్ణ వచ్చే నెల మూడో వారం నుంచి తెలుగుదేశం పార్టీకి ప్రచారం చేయడానికి రంగంలోకి దిగుతారు. చిరంజీవి ఇమేజ్ కు బాలకృష్ణ ఇమేజ్ ను అడ్డువేయడం కోస్తాలో ఆయన అనుసరించే వ్యూహం. బాలకృష్ణకు కూడా చిరంజీవికి ధీటుగా అభిమానులున్నారు. అంతేకాకుండా రాయలసీమలో కూడా బాలకృష్ణ ఇమేజ్ పనికి వస్తుందని ఆయన భావిస్తున్నారు. బాలకృష్ణతో పాటు జూనియర్ ఎన్టీఆర్, కళ్యాణ్ రామ్, తారకరత్న రంగంలోకి దిగుతారు. హరికృష్ణ ఉండనే ఉన్నారు. నందమూరి వంశం ప్రజారాజ్యం గాలిని ఎదుర్కుంటుంది. ఈ రకంగా వచ్చే ఎన్నికల్లో తెలుగుదేశం పార్టీని అధికారంలోకి తేవాలని చంద్రబాబు ఆలోచిస్తున్నారు. పార్టీ నుంచి కొంత మంది వెళ్లిపోవడం వల్ల కూడా పెద్దగా నష్టం ఉండదనేది ఆయన అంచనా. స్థానికంగా మొదటి స్థాయి నాయకత్వం వెళ్లిపోవడం వల్ల ద్వితీయ శ్రేణి నాయకత్వానికి అవకాశం ఇవ్వడానికి వీలవుతుందని, దీనివల్ల వారు ఉత్సాహంగా పనిచేస్తారని ఆయన అభిప్రాయపడుతున్నారు.

మొత్తం మీద, వచ్చే ఎన్నికల్లో అధికారంలోకి రాకపోతే తెలుగుదేశం పార్టీ భవిష్యత్తు ప్రశ్నార్థకంగానే మారుతుంది. చిరంజీవి ప్రజారాజ్యం అస్తిత్వంలోకి వచ్చినందున ఈ ప్రమాదం ముంచుకొచ్చింది. దీంతో సర్వశక్తులూ ఒడ్డడానికి చంద్రబాబు సిద్ధపడుతున్నారు.