బాబు 'కేంద్ర' వ్యూహం

వామపక్ష నేతలకు, తెలుగుదేశం పార్టీ అధ్యక్షుడు నారా చంద్రబాబు నాయుడికి మధ్య విశ్వాసం కుదరడం లేదు. పరస్పరం అనుమానాలతోనే ఉన్నారు. చంద్రబాబుపై వామపక్షాల నేతలకు అనుమానాలు ఉన్నట్లుగానే, వామపక్షాల నేతలపై చంద్రబాబుకు అనుమానాలున్నాయి. దీంతో తృతీయ కూటమి అస్తిత్వం ప్రమాదంలో పడే అవకాశం ఉంది. ప్రభుత్వాన్ని ఏర్పాటు చేయడానికి అవసరమైన మెజారిటీ తృతీయ కూటమికి రాదని, మెజారిటీకి దగ్గరగా కూడా ఉండదని ఎగ్జిట్ పోల్ సర్వేలు తెలుపుతున్నాయి. ఈ స్థితిలో వామపక్షాలు ఏం చేస్తాయనే ఆలోచనలో చంద్రబాబు పడినట్లు సమాచారం. వామపక్షాల నేతల కదలికలను ఆయన జాగ్రత్తగా గమనిస్తున్నారు. వామపక్షాల నిర్ణయాన్ని బట్టే ఫలితాల వెల్లడి తర్వాత తాను నిర్ణయం తీసుకునే ఆలోచనలో ఆయన ఉన్నట్లు సమాచారం. వామపక్షాల ఆలోచన బయట పడే దాకా తాను బయట పడకూడదని ఆయన అనుకుంటున్నారు.

మతతత్వ బిజెపిని వ్యతిరేకించే వైఖరితో వామపక్షాలు కాంగ్రెసు నేతృత్వంలోని యుపిఎకు మద్దతిచ్చినా ఆశ్చర్యం లేదని అంటున్నారు. కాంగ్రెసుకు తమ అంటరానిదేమీ కాదని ఇప్పటికే సిపిఎం నేతలు అంటున్నారు. బిజెపిని అధికారంలోకి రాకుండా అడ్డుకుంటామని సిపిఎం ప్రధాన కార్యదర్శి ప్రకాష్ కారత్ అన్నారు. దీన్ని బట్టి సిపిఎం, సిపిఐలు కాంగ్రెసుకు మద్దతిచ్చే అవకాశాలు లేకపోలేదని చెబుతున్నారు. వామపక్షాలు కాంగ్రెసు వైపు వెళ్తే ఏం చేయాలనే వ్యూహరచన కూడా చంద్రబాబు చేసి పెట్టుకున్నట్లు తెలుస్తోంది. బిజెపికి నేరుగా చంద్రబాబు మద్దతిచ్చే స్థితి లేదని అంటున్నారు. బిజెపి ముందు ఆయన రాజీ ఫార్ములాను ముందు పెట్టనున్నట్లు తెలుస్తోంది.

బీహార్ ముఖ్యమంత్రి నితీష్ కుమార్ ను తమకూ, బిజెపికీ ఆమోదయోగ్యమైన నేతగా ప్రధాని పదవికి ముందుకు తేవచ్చుననే ఊహాగానాలు చెలరేగుతున్నాయి. ఈ స్థితిలో పలు ప్రత్యామ్నాయాలు ముందుకు రావచ్చు. బిజెపికి, తృతీయ కూటమికి ఆమోదయోగ్యమైన ఫార్ములా చంద్రబాబుకు అనువుగా ముందుకు రావచ్చునని సమాచారం. ఈ సమయంలో తన పేరు కూడా ప్రధాని పదవికి చర్చకు వచ్చే అవకాశాన్ని కల్పించాలనేది ఆయన ఎత్తుగడగా భావిస్తున్నారు.

అయితే, ఈ నెల 16వ తేదీన ఫలితాలు వెలువడిన తర్వాత 18వ తేదీన తృతీయ కూటమి సమావేశం జరగనుంది. ఈ సమావేశం లోగానే వామపక్షాల వైఖరి స్పష్టమవుతుంది. తన వ్యూహరచన అమలుకు చంద్రబాబు ఈ నెల 18వ తేదీ సమావేశాన్ని వేదికగా మార్చుకోవచ్చు. వామపక్షాలు కాంగ్రెసు వైపు వెళ్లే స్థితి ఉంటే బిఎస్పీ నేత మాయావతి, జెడిఎస్ నేత దేవెగౌడ వంటి నేతల పేర్లను కూడా బిజెపితో రాజీకి ప్రధాని అభ్యర్థులుగా తృతీయ కూటమి ముందుకు తేవచ్చు. కలిసికట్టుగా ఒక నిర్ణయం తీసుకుని బిజెపిపై ఒత్తిడి తెచ్చే వ్యూహాన్ని చంద్రబాబు అనుసరించవచ్చు.