యాష్కీకి సొంత గూటి కష్టాలు

నిజామాబాద్ లోకసభ స్థానం నుంచి పోటీ చేస్తున్న తెలంగాణ మధు యాష్కీకి ఇతర పార్టీల అభ్యర్థుల నుంచి పెద్దగా తిప్పలు లేవు. సొంత కాంగ్రెసు పార్టీలోని వారే ఆయనకు సవాల్ గా నిలిచారు. నిజామాబాద్ లోకసభ నియోజకవర్గం పరిధిలో ఏడు అసెంబ్లీ స్థానాలున్నాయి. తనకు తన కాంగ్రెసు పార్టీ నాయకుల నుంచి, కార్యకర్తల నుంచే మద్దతు లభించడం లేదు. సర్పంచులు, ఎంపిటిసిలు, ఇతర నాయకులు మంగళవారం రహస్యంగా సమావేశమై మధుయాష్కీకి వ్యతిరేకంగా పని చేయాలని నిర్ణయించుకున్నారు. మార్కెట్ కమిటీ చైర్మన్ ఎం నగష్ రెడ్డి మరికొంత మంది ఆ సమావేశం వద్దకు వెళ్లి వారికి సర్ది చెప్పే ప్రయత్నం చేశారు.

తెలంగాణ అనుకూల నినాదంతో మధుయాష్కి ప్రజల్లో అనతి కాలంలో పేరు సంపాదించుకున్నారు. అయితే తన నియోజకవర్గం ప్రజలకు మాత్రం ఆయన దూరమైనట్లు చెబుతున్నారు. దీంతో ఆయనకు విజయం నల్లేరు మీద బండి నడక కావడం లేదు. ఎక్కువ కాలం ఆయన హైదరాబాదులో, ఢిల్లీలో, అమెరికాలో గడుపుతూ నియోజక వర్గం ప్రజలను పట్టించుకోలేదనే విమర్శలున్నాయి. వైయస్ రాజశేఖర రెడ్డికి వ్యతిరేకిగా ముద్ర పడిన యాష్కీకి సహకరించడానికి పార్టీ శాసనసభ అభ్యర్థులు కూడా ముందుకు రావడం లేదని తెలుస్తోంది. ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ అనుచరురాలు ఆకుల లలిత మినహా కెఆర్ సురేష్ రెడ్డి, షబ్బీర్ అలీ, ఎం. సుదర్శన్ రెడ్డి, ఎం. సుదర్శన్ రెడ్డి, జనార్దన్ గౌడ్, ఎస్ సంతోష్ రెడ్డి, ఎస్ గంగారం, బాజిరెడ్డి గోవర్దన్ యాష్కీ కోసం పని చేయడం లేదు. స్థానిక నాయకులెవరు కూడా పెద్దగా యాష్కీకి అనుకూలంగా లేరని తెలుస్తోంది.