బాద్షాకు వాజ్ పేయి హీరో

ఎన్నికల వేడి రోజు రోజుకు పెరుగుతున్న వేళ బాలీవుడ్ బాద్షా షారూఖ్ ఖాన్ కాంగ్రెసు పార్టీకి ప్రచారం చేస్తారనే వార్తలు వస్తున్నాయి. ఆయన కాంగ్రెసు తరఫున ఎన్నికల్లో పోటీ చేసే అవకాశం ఉందని కూడా ప్రచారం జరుగుతోంది. అయితే, షారూఖ్ ఖాన్ కు మాజీ ప్రధాని, బిజెపి సీనియర్ నేత అటల్ బిహారీ వాజ్పేయి అంటే తెగని మక్కువట. షారూఖ్ ఖాన్ కు గాంధీ కుటుంబంతో సన్నిహిత సంబంధాలున్నాయి. ఆయన తల్లిదండ్రులు కాంగ్రెసు పార్టీలో ఉండేవారు. గాంధీ కుటుంబానికి చెందిన యువతరంతో షారూఖ్ కు సన్నిహిత సంబంధాలున్నాయి. ప్రియాంక, ఆమె భర్త రాబర్ట్ వద్రా, రాహుల్ గాంధీ కింగ్ ఖాన్ కు మంచి మిత్రులు. అవసరం వచ్చినప్పుడల్లా వారు షారూఖ్ కు మద్దతుగా నించున్నారు. ఖాన్ ఐపిల్ జట్టు కోల్ కత్తా నైట్ రైడర్స్ తరఫున నిలబడడానికి ఆ ముగ్గురు కూడా వచ్చారు.

అయితే గాంధీ కుటుంబంతో ఎంత సన్నిహిత సంబంధాలున్నాయో షారూఖ్ కు వాజ్ పేయి కుటుంబంతో కూడా అంతే సన్నిహిత సంబంధాలున్నాయి. వాజ్ పేయి దత్త పుత్రిక నమిత తనకు మంచి స్నేహితురాలని షారూఖ్ స్వయంగా చెప్పాడు. వాజ్ పేయి ఆరోగ్యం గురించి తెలుసుకోవడానికి ఆయన తరుచుగా నమితను కలుస్తుంటాడు. వాజ్ పేయి ప్రసంగాన్ని వినడానికి తన చిన్న తనంలో తన తండ్రి తనను న్యూఢిల్లీలోని ఐఎన్ఎ మార్కెట్ కు తీసుకొని వెళ్తుండేవాడని షారూఖ్ చెప్పాడు. వాజ్ పేయికి హిందీ భాషపై ఆధిపత్యం ఉందని, వాజ్ పేయి మంచి వక్త అని తన తండ్రి చెబుతూ ఉండేవాడని ఆయన అన్నారు. వాజ్ పేయి కోసం తన సినిమాలను షారూఖ్ ప్రదర్శిస్తుంటాడు కూడా.