చిరు టార్గెట్ చంద్రబాబు

ప్రజారాజ్యం పార్టీ అధ్యక్షుడు చిరంజీవి తెలుగుదేశం పార్టీ అధ్యక్షుడు నారా చంద్రబాబు నాయుడిని టార్గెట్ చేసుకున్నట్లు కనిపిస్తోంది. తన విజయం కన్నా ఆయనకు చంద్రబాబు అపజయమే ప్రధానంగా మారినట్లు చెబుతున్నారు. సినీ రంగంలో కమ్మ కుల ఆధిపత్యాన్ని ఎదిరించి అగ్రస్థానానికి చేరుకున్న చిరంజీవికి రాజకీయాల్లోనూ అ పని చేయాలనే సంకల్పం పుట్టినట్లు భావిస్తున్నారు. సినిమాల్లో చిరంజీవి ఒకేసారి అగ్రస్థానానికి ఎదగలేదు. పునాదిరాళ్లు సినిమాలో నలుగురితో పాటు తానూ ఓ ప్రధాన పాత్ర పోషించాడు. కలియుగ పాండవులులోనూ ఆయన హీరో కారు. విలన్ పాత్రలు కూడా పోషించారు. ఒక రకంగా సినీ రంగంలో ఆయన చాలా ఓపికగా పనిచేశారనే చెప్పాలి. ఎన్నో పాత్రలు చేసిన తర్వాతనే ఆయనను మాస్ హీరో పాత్రలు వరించాయి. తెలుగు సినిమా రంగంలో ఆయన ఆ విధంగా ఎదురులేని మాస్ హీరోగా ఎదిగారు.

రాజకీయాల్లో ప్రవేశించిన వెంటనే ఆ మాస్ హీరో ఇమేజ్ ఆయనను అగ్రస్థానంలో నిలబెడుతుందని అందరూ భావించారు. బహుశా, చిరంజీవి కూడా అలాగే భావించి ఉంటారు. కానీ అది జరగలేదు. చిరంజీవి ప్రజారాజ్యం పార్టీ ఎవరూ ఊహించని రీతిలో చతికిలపడ్డారు. అయితే, తెలుగుదేశం పార్టీని నిలువరించడంలో మాత్రం ఆయన ప్రధాన పాత్ర పోషించారనే చెప్పవచ్చు. కోస్తా ప్రాంతంలోని ఇరు కులాల వైరుధ్యాలు చిరంజీవి రాజకీయ ప్రవేశంతో తెలుగుదేశం పార్టీని దెబ్బ తీశాయి. అది కాంగ్రెసుకు కలిసి వచ్చింది.

ఇప్పుడు చిరంజీవి చంద్రబాబును ఎదుర్కోవడానికి కాంగ్రెసు చేయూత ఇస్తున్నారు. చంద్రబాబును రాజకీయంగా దెబ్బ తీయడానికే ఆయన కాంగ్రెసుతో చేతులు కలపడానికి సిద్ధపడినట్లు తెలుస్తోంది. అయితే, ఆయన వ్యక్తిగత రాజకీయ భవిష్యత్తును కూడా ఏదో మేరకు నిర్ణయించవచ్చు. ఏనాటికైనా తాను రాష్ట్ర రాజకీయాల్లో తిరుగులేని నాయకుడిని అవుతాననే ఆత్మవిశ్వాసం చిరంజీవికి ఇప్పుడు అవసరం.