చిరంజీవి మద్దతు తీసుకుంటే....

సమైక్యవాది చిరంజీవి ప్రజారాజ్యం పార్టీతో కాంగ్రెసు చేతులు కలిపింది. భవిష్యత్తులో ఈ చెలిమి కొనసాగుతుందని ప్రజారాజ్యం పార్టీ అధినేత చిరంజీవి చెబుతున్నారు. అంశాలవారీగా కాంగ్రెసుకు మద్దతు ఉంటుందని ఆయన ప్రకటించారు. రాజ్యసభ ఎన్నికల్లో కాంగ్రెసుకు మద్దతు ప్రకటించి తన ఉదారతను చాటుకున్నారు. ఇప్పుడు తెలంగాణలోని 12 శాసనసభా నియోజకవర్గాలకు ఉప ఎన్నికలు రాబోతున్నాయి. ఈ ఎన్నికలకు సంబంధించి ఈ నెల 25వ తేదీలోగా నోటిఫికేషన్ వెలువడే అవకాశం ఉందని భావిస్తున్నారు. ఈ ఎన్నికలపై చిరంజీవి ఇప్పటి దాకా తేల్చుకోలేదు. ఈ ఎన్నికలు చిరంజీవికి ముందు గొయ్యి, వెనక నుయ్యిలా ఉన్నాయి.

తెలంగాణలోని ఉప ఎన్నికల్లో పోటీ చేసే సాహసం చిరంజీవి చేస్తారా అనేది అనుమానమే. అయితే, తాజా స్నేహం ప్రకారం ఆయన కాంగ్రెసుకు మద్దతు ప్రకటించాలి. చిరంజీవి మద్దతును కాంగ్రెసు పార్టీ తీసుకుంటుందా అనేది సందేహమే. ఇప్పటికే తెలంగాణలో వ్యతిరేకతను ఎదుర్కుంటున్న కాంగ్రెసు పార్టీ చిరంజీవి మద్దతు తీసుకుంటే ప్రజల ఆగ్రహావేశాలకు గురి కాక తప్పదు. సమైక్యవాది అయిన చిరంజీవితో చెలిమిని జీవన్ రెడ్డి లాంటి తెలంగాణ కాంగ్రెసు నాయకులు ఇప్పటికే వ్యతిరేకిస్తున్నారు. చిరంజీవి మద్దతు ప్రకటిస్తే కాంగ్రెసుకు మేలు కన్నా కీడే ఎక్కువగా జరిగే అవకాశం ఉంది. చిరంజీవిని తెలంగాణలో అడుగుపెట్టనివ్వమని తెలంగాణవాదులు అంటున్నారు. ఆయన మద్దతు తీసుకుంటే కాంగ్రెసుకు మొదటికే మోసం జరగవచ్చు. అందువల్ల కాంగ్రెసు చిరంజీవి మద్దతు తీసుకునే అవకాశం లేదు.

కాంగ్రెసు నేతలను సంప్రదించకుండా ఆ పార్టీకి చిరంజీవి ఉప ఎన్నికల్లో మద్దతు ప్రకటించే పరిస్థితి కూడా లేదు. ఒకవేళ అలా ప్రకటిస్తే కాంగ్రెసు నాయకులు తిరస్కరించే అవకాశమే ఎక్కువగా ఉంది. దాని వల్ల చిరంజీవికి పరాభవం తప్పకపోవచ్చు. ఉప ఎన్నికలపై చిరంజీవి మౌనంగా ఉంటారా, నామ మాత్రంగా పోటీ చేస్తారా అనేది వేచి చూడాల్సిందే.