రాహుల్ తో జగన్ కు పోలికా?

కాంగ్రెసు అధ్యక్షురాలు సోనియా గాంధీ కుమారుడు, పార్లమెంటు సభ్యుడు రాహుల్ గాంధీతో పార్టీ కడప పార్లమెంటు సభ్యుడు వైయస్ జగన్మోహన్ రెడ్డిని పోల్చడం ఆనవాయితీగా మారింది. ఒక రకంగా జగన్ కూడా తనను రాహుల్ గాంధీతో పోల్చుకుంటున్నట్లే ఉంది. ఆయన అనుయాయులు దానికి విశేష ప్రచారం సాగిస్తున్నారు. రాహుల్ గాంధీ దేశవ్యాప్తంగా వ్యక్తిగత పర్యటనలు ఎలా చేస్తున్నారో జగన్ కూడా అలాగే రాష్ట్రంలో వ్యక్తిగత పర్యటనలు చేస్తున్నారని, ఓదార్పు యాత్ర అటువంటిదేనని అంటున్నారు. అయితే అలాంటి పోలిక సరిపోతుందా అనేది సందేహమే. రాహుల్ కు ఉన్నంత ఆమోదం జగన్ కు ఉందా అనేది కూడా అనుమానమే. ఏ విషయాల్లో జగన్ రాహుల్ కు సరిపోతారనే ఆలోచన ఆయన వర్గీయులకు లేకుండా పోయింది.

రాహుల్ గాంధీ ప్రధాని పదవిని చేపట్టాలంటే ఏ విధమైన అడ్డంకులు లేవు. మన్మోహన్ సింగ్ సడీచప్పుడు లేకుండా ప్రధాని పీఠం నుంచి గిది రాహుల్ గాంధీకి అప్పగించగలరు. కానీ రాహుల్ గాంధీ దాని కోసం ఆతురత పడడం లేదు. ఆయనకు ప్రధాని పదవి మీద ఆశ లేదని చెప్పలేం. కానీ, కొంత అనుభవం, పరిస్థితులపై అవగాహన, రాజకీయాలపైనా పార్టీపైనా పట్టు పూర్తిగా ఉండాలని, అవన్నీ సాధించిన తర్వాతనే ప్రధాని పదవిని చేపట్టాలని రాహుల్ గాంధీ అనుకుంటున్నట్లు తెలుస్తోంది. అలాగే, రాహుల్ గాంధీ వ్యక్తిగత పర్యటనలకు హంగులూ ఆర్భాటాలూ ఉండడం లేదు. ఆయన ఎక్కడికైనా ఇలా వచ్చి అలా వెళ్లిపోతున్నారు. ఆయనకున్న ప్రజాకర్షణ దృష్ట్యా మీడియా ఆయనను వదిలిపెట్టదు. దానివల్ల మీడియా పబ్లిసిటీ ఆయనకు ఎక్కువగానే లభిస్తుంది.

అయితే, జగన్ కు రాహుల్ కు ఉన్నంత ఓపిక ఉన్నట్లు కనిపించడం లేదు. ఆయన ఎప్పుడు ముఖ్యమంత్రి పీఠం మీద కూర్చుందామా అనే ఆతురతతోనే పనిచేస్తున్నట్లు కనిపిస్తోంది. ఆయన రాష్ట్ర కాంగ్రెసు నాయకుల నుంచి పూర్తి మద్దతు లేదు. ఒక బలమైన వర్గం ఆయనను తీవ్రంగా వ్యతిరేకిస్తోంది. ఆయనకు రాష్ట్రంలో ఒక వర్గం మద్దతు ఉంది. అందువల్ల ఆయన రాష్ట్రంలో అందరికీ ఆమోదయోగ్యుడైన నాయకుడు కాదనేది తేలిపోతూనే ఉంది. రాహుల్ గాంధీ ప్రధాని పదవి చేపట్టడానికి 2014 ఎన్నికల వరకు నిరీక్షించాలనే ఉద్దేశంతో ఉన్నట్లు కనిపిస్తోంది. అయితే, తాను ప్రధాని పదవిని చేపట్టాలనే ఉద్దేశంతో ఉన్నట్లు ఆయన ఏ రోజు కూడా కనిపించడం లేదు. అందువల్ల జగన్ కు, రాహుల్ కు ఏ విధమైన పోలిక చెప్పలేం.