తమిళనాడులో చిరు హిట్టవుతారా?

By Pratap

Published: Sunday, March 20, 2011, 11:15 [IST]

సొంత రాష్ట్రం ఆంధ్రప్రదేశ్‌లో ఫ్లాప్ అయిన ప్రజారాజ్యం పార్టీ అధినేత, మెగాస్టార్ చిరంజీవి తమిళనాడులో హిట్టవుతారా అనేది ప్రశ్న. తమిళనాడు శాసనసభ ఎన్నికల్లో చిరంజీవి కాంగ్రెసు పార్టీ తరఫున ప్రచారం చేయనున్నారు. ఈ ప్రచార వ్యూహంపై చర్చించడానికి చిరంజీవిని కాంగ్రెసు అధిష్టానం ఢిల్లీకి పిలిపించింది. తమిళనాడులో చిరంజీవి స్టార్‌డమ్ పని చేస్తుందని కాంగ్రెసు అధిష్టానం నమ్ముతోంది. చిరంజీవికి ఆంధ్రప్రదేశ్‌లోనే కాకుండా తమిళనాడులోనూ ఫాలోయింగ్ ఉంది. చిరంజీవి సినిమాలు చాలా వరకు తమిళంలోకి డబ్బయ్యాయి. ఆ సినిమాలు బాగానే ఆడాయి.

తమిళనాడులో చాలా చోట్ల తెలుగువాళ్లు ఉన్నారు. తెలుగు ప్రజలు అధికంగా ఉన్న ప్రాంతాల్లో చిరంజీవి ప్రచారం తమకు ఉపయోగపడుతుందని కాంగ్రెసు అధిష్టానం భావిస్తోంది. చిరంజీవి కొంత కాలం తమిళనాడులో నివాసం కూడా ఉన్నారు. ఆయనకు మాత్రమే కాకుండా ఆయన బావమరిది అల్లు అరవింద్‌కు కూడా సంబంధాలున్నాయి. నిర్మాతగా అల్లు అరవింద్ తనకున్న సంబంధాలతో సినీ తారలను కూడా కాంగ్రెసు తరఫున ప్రచారంలోకి దించుతారా అనేది ఆసక్తికరంగా మారింది.

తమిళనాడులో డిఎంకెతో కాంగ్రెసు పార్టీ పొత్తు పెట్టుకుంది. డిఎంకెకు తారాబలం దండిగానే ఉంది. డిఎంకె నేత, ముఖ్యమంత్రి కరుణానిధి సినీరంగానికి చెందినవారు కావడం అందుకు ఓ కారణం. డిఎంకెకు ఉన్న సినీ తారల బలానికి చిరంజీవి బలం కూడా తోడవుతుందని కాంగ్రెసు అధిష్టానం భావిస్తున్నట్లు సమాచారం. తమిళనాడులో తాను చేపట్టబోయే ప్రచార కార్యక్రమంపై చిరంజీవి కాంగ్రెసు అధ్యక్షురాలు సోనియా గాంధీ రాజకీయ కార్యదర్శి అహ్మద్ పటేల్‌తో చర్చిస్తారు. దానితో పాటు కాంగ్రెసులో ప్రజారాజ్యం విలీనసభపై కూడా మాట్లాడుతారు.

Published On March 20, 2011