చిరంజీవిపై రాహుల్ గాంధీకి మెగా ఆశలు

By Pratap

Published: Monday, October 10, 2011, 18:01 [IST]

పార్టీలోకి కొత్తగా వచ్చిన చిరంజీవిపై ఎఐసిసి ప్రధాన కార్యదర్శి, కాంగ్రెసు అధ్యక్షురాలు సోనియా గాంధీ తనయుడు రాహుల్ గాంధీ పెద్ద యెత్తునే ఆశలు పెట్టుకున్నట్లున్నారు. ఆ ఆశలతోనే చిరంజీవికి రాహుల్ అత్యధిక ప్రాధాన్యం ఇస్తున్నారని అంటున్నారు. మొత్తం కాంగ్రెసులోనే రాష్ట్రం నుంచి చిరంజీవి ప్రధాన నాయకుడిగా గుర్తింపు పొందుతున్నట్లు తాజా పరిణామాలను బట్టి అర్థమవుతోంది. ఇటీవల చిరంజీవితో రాహుల్ గాంధీ సుదీర్షంగా చర్చలు జరిపారు. ఆ తర్వాత తెలంగాణపై పార్టీ ముఖ్య నేతల అభిప్రాయాలు తెసుకునే క్రమంలో కాంగ్రెసు మినీ కోర్ కమిటీ చిరంజీవిని కూడా ఢిల్లీకి ఆహ్వానించింది. చిరంజీవి అభిప్రాయాలు కూడా తెలుసుకుంది.

2014 ఎన్నికల్లో కాంగ్రెసు పార్టీని విజయపథాన నడిపించి, తాను ప్రధాని పదవి చేపట్టాలని రాహుల్ గాంధీ అనుకుంటున్నారు. కేంద్రంలో కాంగ్రెసు అధికారంలోకి రావడానికి ఆంధ్రప్రదేశ్‌లో అత్యధిక సీట్లు సాధించడం అనివార్యంగా మారింది. ప్రస్తుతం కాంగ్రెసు ఆంధ్రప్రదేశ్‌లో సాధించుకున్న సీట్ల ద్వారా మాత్రమే అధికారంలోకి రాగలిగిందనే అభిప్రాయం ఉంది. వచ్చే ఎన్నికల్లో కాంగ్రెసుకు ఓట్లను తెచ్చే పెట్టే కీలకమైన నాయకుడిగా చిరంజీవిని రాహుల్ గాంధీ భావిస్తున్నారని అంటున్నారు. ముఖ్యంగా యువతను, విద్యార్థులను కాంగ్రెసు వైపు కూడగట్టడానికి చిరంజీవి ఇమేజ్ పనికి వస్తుందని ఆయన అంచనా వేస్తున్నారు.

రాహుల్ గాంధీ యువతను, విద్యార్థులను కాంగ్రెసులోకి తేవడానికి దేశవ్యాప్తంగా పర్యటనలు కూడా చేశారు, చేస్తున్నారు. అధికారాన్ని చేజిక్కించుకోవడానికి సాంప్రదాయిక ఓటర్లు సరిపోరని, యువతను ఆకర్షించడం అవసరమని భావిస్తున్నారు. ఆంధ్రప్రదేశ్‌లోని యువతో చిరంజీవి అంటే క్రేజ్ ఉంది. ఆ క్రేజ్‌ను ఓట్ల రూపంలోకి మార్చకోవడానికి చిరంజీవి పనికి వస్తారని అంటున్నారు. అలాగే, రాష్ట్రంలోని యువత ఎక్కువగా వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వైపు చూస్తున్నారనే అభిప్రాయం ఉంది. వైయస్ జగన్ వైపు యువత వెళ్లకుండా చిరంజీవిపై ఉన్న అభిమానం కూడా పనిచేస్తుందని భావిస్తున్నారు.

Published On October 10, 2011