ఎమ్మెల్యేల కట్టడికి జగన్ కొత్త వ్యూహం

By Pratap

Published: Friday, September 16, 2011, 12:05 [IST]

తన వర్గం శాసనసభ్యులు జారిపోకుండా వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి కొత్త వ్యూహాన్ని అనుసరిస్తున్నారు. సిబిఐ ఎఫ్ఐఆర్‌లో వైయస్సార్ పేరు చేర్చినందుకు నిరసనగా రాజీనామా చేసిన 26 మంది శానససభ్యుల్లో కొంత మంది వెనక్కి మళ్లే ప్రయత్నంలో ఉన్న స్థితిలో దాన్ని నివారించడానికి ఆయన ఈ వ్యూహాన్ని అనుసరిస్తున్నట్లు కనిపిస్తోంది. శాసనసభ్యుల రాజీనామాలను శాసనసభ స్పీకర్ నాదెండ్ల మనోహర్ చేత ఆమోదింపజేయడమే కాకుండా కాంగ్రెసు పార్టీకి చేసిన రాజీనామాలు కూడా ఆమోదం పొందేలా చూడడం ఆ ఎత్తుగడ. ఇందుకుగాను వైయస్సార్ కాంగ్రెసు పార్టీ నాయకులు కాంగ్రెసు నాయకత్వాన్ని రెచ్చగొట్టే పనికి పూనుకున్నారు.

జగన్ వర్గానికి చెందిన శాసనసభ్యులు తమ శాసనసభా సభ్యత్వాలకే కాకుండా కాంగ్రెసు పార్టీకి కూడా రాజీనామాలు చేశారు. కాంగ్రెసు పార్టీకి చేసిన రాజీనామాలను ఆమోదింపజేయాలనేది జగన్ వ్యూహం. పార్టీకి చేసిన రాజీనామాలను ఆమోదిస్తే వారు వెనక్కి తగ్గడం అంత సులభం కాదనేది జగన్ ఆలోచన. అందుకే, దమ్ముంటే కాంగ్రెసు పార్టీకి శాసనసభ్యులు చేసిన రాజీనామాలను ఆమోదించాలని వైయస్సార్ కాంగ్రెసు పార్టీ నాయకులు పిసిసి అధ్యక్షుడు బొత్స సత్యనారాయణకు సవాల్ విసురుతున్నారు. వైయస్సార్ కాంగ్రెసు పార్టీ నాయకుడు గట్టు రామచందర్ రావు గురువారం మీడియా ప్రతినిధుల సమావేశంలో అదే సవాల్ విసిరారు.

ఉప ఎన్నికలను ఎదుర్కోవడానికి సిద్ధంగా లేని వైయస్ జగన్ వర్గానికి చెందిన శాసనసభ్యులు క్రమంగా కాంగ్రెసు వైవు తిరిగి వస్తున్న సూచనలు కనిపిస్తున్నాయి. ఒక రకంగా వారు డబుల్ గేమ్ ఆడుతున్న సూచనలు కనిపిస్తున్నాయి. అనంతపురం జిల్లాలో గుర్నాథ రెడ్డి ముఖ్యమంత్రి కిరణ్ కుమార్ రెడ్డి సమావేశంలో పాల్గొన్నారు. పశ్చిమ గోదావరి జిల్లాలో జగన్ వర్గానికి చెందిన శాసనసభ్యులు కిరణ్ కుమార్ రెడ్డి నిర్వహించిన సమీక్షా సమావేశంలో పాలు పంచుకున్నారు. కాంగ్రెసును వదులుకోవాలని వారు గట్టిగా అనుకుంటే సమావేశాలకు హాజరై ఉండేవారు కారు. అందువల్ల వారు కచ్చితంగా జగన్ వైపు ఉంటారని చెప్పడానికి వీలు లేని స్థితి. అందుకే కాంగ్రెసు పార్టీకి చేసిన రాజీనామాలను ఆమోదింపజేసి వారిని కట్టడి చేయాలనేది జగన్ వ్యూహంగా భావిస్తున్నారు.

Published On September 16, 2011