వైయస్ జగన్ కోసం బిసి పార్టీ వస్తుందా?

By Pratap

Published: Friday, March 9, 2012, 10:36 [IST]

తన కోసం వైయస్సార్ కాంగ్రెసు పార్టీ అధ్యక్షుడు వైయస్ జగన్ రాష్ట్రంలో ఓ బిసి పార్టీని పెట్టిస్తున్నట్లు ఓ ప్రముఖ తెలుగు దినపత్రిక రాసింది. తెలుగుదేశం, కాంగ్రెసు బిసి ఓట్ల కొల్లగొట్టడానికి ఆయన ఈ పనికి పూనుకున్నట్లు ఆ పత్రిక రాసింది. రెడ్లు, క్రైస్తవులు, ఎస్సీలు తన వైపు ఉన్న నేపథ్యంలో బిసి ఓట్లను కాంగ్రెసు, తెలుగుదేశం పార్టీలకు దూరం చేసి తనకు అనుకూలంగా మలుచుకోవడానికి వైయస్ జగన్ బిసి పార్టీని పెట్టించే ప్రయత్నాలు చేస్తున్నట్లు తెలుస్తోంది. బిసి పార్టీ ద్వారా బిసిల ఓట్లను చీల్చి విజయం సాధించడం ఆయన వ్యూహంగా ఆ పత్రిక రాసింది.

రాబోయే బిసి పార్టీతో పొత్తు కుదుర్చుకుని, ఆ పార్టీకి కొన్ని సీట్లు కేటాయించాలని జగన్ ఆలోచిస్తున్నారట. తద్వారా తాను లబ్ధి పొందాలని చూస్తున్నారని ఆ పత్రిక రాసింది. జగన్ తన కోసం ఓ బిసి పార్టీని పెట్టిస్తున్నారని తెలంగాణకు చెందిన ఓ సీనియర్ పార్లమెంటు సభ్యుడు కాంగ్రెసు అధ్యక్షురాలు సోనియా గాంధీకి లేఖ రాసినట్లు ఆ పత్రిక రాసింది. వైయస్ రాజశేఖర రెడ్డి అధికారంలో ఉన్నప్పుడు వైయస్, కెవిపి రామచందర్ రావు ద్వారా ప్రయోజనం పొందిన బిసి నేతలతో జగన్ రాజకీయ పార్టీని స్థాపించబోతున్నారని ఆనయ సోనియాకు లేఖలో వివరించారని సమాచారం.

జగన్ వ్యూహాన్ని ఎదుర్కోవడానికి కాంగ్రెసు పార్టీలో బిసిలను ప్రోత్సహించాల్సిన అవసరం ఉందని ఆ పార్లెమంటు సభ్యుడు లేఖలో చెప్పినట్లు ఆ తెలుగు దినపత్రిక తెలిపింది. ముఖ్యమంత్రి కిరణ్ కుమార్ రెడ్డి బిసిలను పట్టించుకోవడం లేదని ఆయన ఆ లేఖలో సోనియాకు ఫిర్యాదు చేశారని ఆ పత్రిక రాసింది.

Published On March 9, 2012