జైళ్లో ఏడుస్తూ శ్రీలక్ష్మి, ఉల్లాసంగా విజయ సాయి

కర్నాటక మాజీ మంత్రి గాలి జనార్ధన్ రెడ్డి ఓబుళాపురం మైనింగ్ కేసులో అరెస్టైన ఐఏఎస్ అధికారిణి శ్రీలక్ష్మి జైల్లో ఏడుస్తున్నారట. తొమ్మిదో నెంబర్ బ్యారక్‌లో ఉంటున్న ఆమె వెన్నునొప్పితో బాధపడుతున్నారు. ఒంటరిగా ఉంటూ తన పరిస్థితికి ఏడుస్తున్నారట. ఆమె ఉంటున్న బ్యారక్‌లో ఎక్కువమంది వరకట్నం కేసుల్లో అరెస్టైన మహిళలే ఉన్నారు. ఒంటరిగానే ఎక్కువగా గడుపుతున్న శ్రీలక్ష్మి అప్పుడప్పుడు వారితో మాట్లాడుతున్నారు. ఆదివారం ఖైదీలకు అందరికీ భోజనంలో చికెన్ ఇచ్చినప్పటికీ శ్రీలక్ష్మి మాత్రం శాఖాహారమే తీసుకున్నారు. తనను సిబిఐ అరెస్టు చేసిన తర్వాత ఆమె మొదటి రోజు కోఠిలోని సిబిఐ కార్యాలయంలో ఉన్న విషయం తెలిసిందే. అప్పుడు కూడా ఆమె తనకు తోడుగా ఉన్న ఇద్దరు మహిళా కానిస్టేబుల్స్‌తో తన బాధను వెళ్లగక్కిన విషయం తెలిసిందే. తాను ఏ తప్పూ చేయలేదని, ఎవరో చేసిన తప్పుకు తాను శిక్షను అనుభవించవలసి వస్తుందని ఆమె వారితో తన ఆవేదనను చెప్పుకున్నారు.

మరోవైపు వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి ఆస్తుల కేసులో అరెస్టైన జగతి పబ్లికేషన్స్ వైస్ చైర్మన్ విజయ సాయి రెడ్డి జైల్లో షటిల్ ఆడుతున్నారు. షటిల్ ఆడేందుకు అవసరమైన కిట్‌ను ఆయన బంధువులు శనివారం తీసుకొచ్చి ఇచ్చారు. ఆదివారం ఉదయం లేచిన తర్వాత వ్యాయామం కోసం షటిల్ ఆడారు. ఉదయం ఆరు గంటలకు నిద్రలేస్తున్న విజయ సాయి బ్యారక్‌లో వ్యాయామం చేస్తూ జైలు ఆవరణలో గంట పాటు షటిల్ ఆడుతున్నారట. అనంతరం ఎనిమిదిన్నర గంటలకు స్నానం, పూజలు పూర్తి చేసుకొని తొమ్మిది గంటల వరకు సిబిఐ కస్టడీకి వెళ్లేందుకు సిద్ధంగా ఉంటున్నారని తెలుస్తోంది.

English summary

IAS officer Srilaxmi is crying in jail and Vijaya Sai Reddy, who was arrested in Jagan properties case is playing shatil in jail.