రోజాకు పోటీగా భువనేశ్వరి

తారాజువ్వలా దూసుకెళ్తున్న రోజా పై తెలుగుదేశం పార్టీలో అంతర్గత శత్రువులు ఎక్కువవుతున్నారు. రోజా చంద్రగిరి నుంచి తెలుగుదేశం టికెట్ ఆశిస్తున్న విషయం తెలిసిందే. పార్టీలోని రోజా ప్రత్యర్ధులు అందుకు అడ్డు పుల్ల వేశారు. చంద్రబాబు నాయుడు భార్య భువనేశ్వరిని అక్కడ నిలబెట్టాలని సూచించారు. టీడీపీ అధ్యక్షుడు చంద్రబాబు సొంత జిల్లా చిత్తూరులోని చంద్రగిరి నియోజకవర్గంలో ఈ విధంగా ఆసక్తికర పరిణామాలు చోటు చేసుకుంటున్నాయి.

చంద్రగిరి సీటును రాష్ట్ర తెలుగు మహిళ అధ్యక్షురాలు రోజాకు ఖరారు కాకుండా అడ్డుకోవడానికి ఆ నియోజకవర్గానికి చెందిన కొందరు నేతలు ఏకంగా చంద్రబాబు సతీమణి భువనేశ్వరి పేరునే ప్రస్తావించారు. ఇటీవల జరిగిన ఆ నియోజకవర్గ సమావేశంలో ఈ ప్రతిపాదన తెచ్చారు. ఇది చంద్రబాబునే ఆశ్చర్యానికి గురి చేసింది. ఆ ప్రతిపాదన నచ్చని ఆయన వారిని వారించినట్లు తెలిసింది.