చంద్రబాబు మారరా?

అనేక పార్టీలు రంగంలోకి వచ్చిన నేపధ్యంలో తెలుగుదేశం పార్టీకి మంచి అవకాశాలు కలిసి వస్తున్నాయి. కానీ ఆ పార్టీ అధినేత చంద్రబాబు నాయుడు ఇంకా తన వ్యవహార శైలిని పూర్తిగా మార్చుకోలేదు. నందమూరి అందగాళ్ళను రంగంలోకి దించితే చాలని ఆయన భావించడం సమంజసంగా లేదు. నందమూరి హీరోల వల్ల తెలుగుదేశం పార్టీకి కొంత మేలు జరుగుతుంది కానీ అదే పూర్తిగా పనిచేయదు.

తన పార్టీలో ఉన్న వివిధ కులాలకు చెందిన అగ్ర నాయకులు రాష్ట్ర వ్యాప్తంగా తిరిగి ఆయా వర్గాల వారి మద్దతును టిడిపికి తెచ్చేలా చంద్రబాబు నాయుడు విప్లవాత్మక నిర్ణయాలను తీసుకో వలసి ఉంది. ఉదాహరణకు ఎర్రంనాయుడిని ఆ మూడు జిల్లాలకు సంబంధించి నియోగించాలి. యాదవ కులానికి చెందిన యనమలను రాష్ట్ర మంతటా తిప్పాలి. కానీ కొన్ని భయాల వల్ల చంద్రబాబు నాయుడు తన తర్వాతి నాయకులకు కావలసినంత స్వేచ్చ ఇవ్వడం లేదు.

బిసీలే పునాదిగా ఎదిగిన పార్టీ తెలుగుదేశం. ఇప్పటికీ ఆ పార్టీకి పెట్టని కోటగా ఉన్నది బీసీలే. చంద్రబాబు నాయుడికి ఆ సత్యం తెలిసినా, ఆయన నేల విడిచి సాము చేస్తున్నారు. చంద్రబాబు నాయుడు వ్యవహార శైలితో విసిగిపోవడం వల్లనే ఈనాడు రామోజీరావు చిరంజీవికి, చంద్రశేఖరరావుకు మద్దతు ఇస్తున్నట్టు కనిపిస్తోంది.