ఐఎఎస్ ల ఒడిలో చిరంజీవి పాఠాలు!

రాజకీయాల్లోకి వచ్చే ముందే అనేక పరిపాలన, రాజ్యాంగ, న్యాయ విషయాలను చిరంజీవి నేర్చుకుంటున్నారు. ఆయనకు ఇద్దరు మాజీ ఐఎఎస్ అధికారులు, ఇద్దరు సర్వీసులో ఉన్న ఐఎఎస్ ఆఫీసర్లు శిక్షణ ఇస్తున్నారు. తానే కాబోయే ముఖ్యమంత్రినని అనుకుంటున్న చిరంజీవి సినిమా ఫక్కీలో బుద్ధి మంతుడైన కుర్రాడిలా విషయాలను నేర్చుకుంటున్నారు. తాను నటించబోయే సినిమాల విషయంలో కూడా చిరంజీవిది ఇదే శైలి. కథ పూర్తిగా అర్ధమయ్యేంతవరకు ఆయన అభ్యాసం కొనసాగుతుంది.

కులాల ప్రాతిపదికగా కాకుండా ఆర్ధిక ప్రాతిపదికగా రిజర్వేషన్లు ఉండాలని చిరంజీవి భావిస్తున్నారు. ఆయన ఐఎఎస్ గురువులు, ఆయన రాజకీయ సలహాదారు డాక్టర్ మిత్రా ఆ విధంగా గైడ్ చేస్తున్నారు. కానీ చిరంజీవి ఆ వైఖరి తీసుకుంటే తాను ఎక్కిన కొమ్మను తానే నరుక్కున్నట్టు అవుతుందని సోషలిస్టు నాయకులు భావిస్తున్నారు. చిరంజీవి ఏ సామాజిక నేపధ్యం నుంచి వచ్చారో దానిని విస్మరించి, విజయవంతం కాని కమ్యూనిస్టు భావ జాలాన్ని అనుసరించడం మంచిది కాదని వీరి అభిప్రాయం. చిరంజీవి ఇంకా టెక్స్ట్ బుక్స్ చదువుకుంటున్నట్టు కన్పిస్తే రాజకీయాల్లో రాణించడం కష్టమని అంటున్నారు.