బాలకృష్ణ వైపు దాసరి!

సినిమారంగం నుంచి రాజకీయాల్లోకి వెళ్ళిన దాసరి నారాయణరావు ఆ రంగంలో సక్సెస్ అయినా నిలదొక్కుకోలేకపోయారు. రాజ్యసభ సభ్యతం దొరకడం ఒక అదృష్టమైతే, బొగ్గు గనుల శాఖ సహాయ మంత్రి కావడం మరో వరం. అయితే మంత్రి పదవి సడన్ గా ఊడిపోవడంతో ఆయన మానసికంగా కుంగిపోయారు.

తల్లి వంటి సినిమా రంగంలోకి ఆయన భారీగా ప్రవేశించినట్టే. నిర్మాతగా, దర్శకుడిగా, నటుడిగా ఆయన విశ్వరూపం ప్రదర్శించనున్నారు. మొదట్లో చిరంజీవికి క్లోజ్ గా ఉన్నా ఆ తర్వాత వారి మధ్య విభేదాలు వచ్చాయి. సినీరంగ ప్రముఖులకు చిరంజీవి తేనీటి విందు ఇచ్చినప్పుడు దాసరి హాజరు కాలేదు.

హీరో బాలకృష్ణతో "బొబ్బిలిపులి" అనే సినిమా తీయడానికి దాసరి సిద్ధమవుతున్నట్టు సమాచారం. వచ్చే నెలలో తెలుగుదేశం పార్టీలో కీలక పాత్ర వహించనున్న బాలకృష్ణకు ఈ సినిమా గొప్ప రాజకీయ భవిష్యత్తును ఇవ్వగలదని పరిశీలకులు భావిస్తున్నారు. చిరంజీవి, బాలకృష్ణ మంచి మిత్రులైనా ఇప్పుడు రాజకీయ ప్రత్యర్ధులైపోయారు. అయినా వీరిద్దరూ రాజకీయాలను స్పోర్టివ్ స్పిరిట్ తో తీసుకుని, కొత్త రాజకీయాలకు నాంది పలకాలని ఆశిద్దాం.