చిరంజీవికి 'చాలెంజ్'

మరో ఐదేళ్ళపాటు చిరంజీవి ప్రజారాజ్యం పార్టీని నడిపించగలరా? అలా నడిపించడం ఆయనకు నిజంగా సవాలే. చంద్రబాబు వంటి ఘనాపాటీ రాజకీయ నాయకులే మరో ఐదేళ్ళ పాటు తెలుగుదేశం పార్టీని అధికారం లేకుండా నడిపించడం కష్టమని కలత చెందుతున్న రోజులివి. మరి రాజకీయాల్లో చిరు చిరుత అయిన చిరంజీవి తట్టుకోగలరా? ఇప్పటికే పార్టీని వీడిపోయినవారు ఆయనకు తాటాకులు కడుతున్నారు. ఆయన అభిమానుల నుంచి కూడా వత్తిడి ఉంది. తమను కాకుండా ఇతర పార్టీల నుంచి వచ్చిన వారిని డబ్బున్న వారిని నమ్ముకోవడం వల్ల పార్టీకి అన్యాయం జరిగిందని చిరు అభిమానుల వాదన. ఇప్పుడు అందరినీ కలుపుకుని అందరి వాడు అనిపించుకోవడం చిరంజీవికి నిజంగా సవాలే.

మరో వైపు సొంత కుటుంబంలోనే కుంపట్లు రాజుకున్నాయన్న వార్తలు వస్తున్నాయి. అల్లు అరవింద్ పై పవన్ సత్యాగ్రహం, నాగబాబు ధర్మాగ్రహం నిజంగా ఆలోచించాల్సిన విషయాలు. చిరు మాటను తమ్ముళ్ళు జవదాటిపోరు. కానీ చిరంజీవి తన కుటుంబ పంచాయితీని కూడా ఒక మంచి నాయకుడిగా పరిష్కరించి అందరినీ ఆనందపరచవలసిన బాధ్యత ఉంది. సినిమాల్లో అయితే చిరంజీవి ఆరు ఫైట్లు నాలుగు డ్యూయెట్లతో కథను సమాప్తం చేసి సూపర్ హిట్ గా బయటపడేవారు. ఇప్పుడు రాజకీయాల్లో ఆ హీరోయిజం సాధ్యమా?