చిరంజీవి సొంత చానల్?

చంద్రబాబు నాయుడి కోసం ఈటీవీ, టీవీ-5 ఉన్నాయని కాంగ్రెస్ వాళ్ళు అంటున్నారు. వైఎస్ కోసం 'సాక్షి' చానల్ సిద్ధమవుతోందన్న విషయం అందరికీ తెలిసిందే. మరి చిరంజీవి ప్రజారాజ్యం పార్టీని పూర్తిగా భుజాన వేసుకునే చానల్ ఏది? చిరంజీవికి మాటీవీలో చెప్పుకోదగిన వాటా ఉందన్న విషయం తెలిసిందే. అయితే అది ఇప్పటికీ ప్రధానంగా ఎంటర్ టైన్ మెంట్ చానలే. ఆ గ్రూపు నుంచి న్యూస్ చానల్ కోసం దరఖాస్తు చేసుకోగా అందుకు లైసెన్సు వచ్చినట్టు తెలుస్తోంది. ఈ సమయంలో తనకంటూ ఒక సొంత న్యూస్ చానల్ ఉండాలని భావిస్తున్న చిరంజీవి ఆ చానల్ ఆర్ధిక బాధ్యతను పూర్తిగా తీసుకోడానికి సిద్ధమవుతున్నట్టు చెబుతున్నారు.

"మా"తో పెట్టుకోకుండా సొంతంగా "మెగా" చానల్ ను పెట్టుకోవాలని చిరంజీవి వందిమాగధులు సూచిస్తున్నారు. కానీ ఈ "మెగా చానల్" కోసం ఇప్పుడు దరఖాస్తు చేసుకుంటే లైసెన్సు రావడానికి మరో ఆరునెలలు పడుతుంది. ఎన్నికల సమయంలో రానప్పుడు ఆ చానల్ వల్ల తక్షణ ఉపయోగమేమిటన్నది చిరు క్యాంపులోని మేధావుల ప్రశ్న. అయినా మంత్రాలకు చింతకాయలు రాలుతాయా? చానళ్ళ ప్రభావం వల్ల ఓట్లు పడతాయా? అంతా భ్రాంతియేనేమో? ఓటర్లు వీరి కంటే ఎంతో తెలివైన వారేమో?