జీవిత ఆశాభంగం!

హీరో రాజశేఖర్, ఆయన భార్య జీవితలకు కాంగ్రెస్ పార్టీలో చేదు అనుభవమే ఎదురౌతోంది. వచ్చే రాని తెలుగులో రాజశేఖర్, కత్తి లాంటి తెలుగులో జీవిత టీవీ చానల్స్ ముందుకు వచ్చినా వాళ్ళ మొహాల్లో ఆనందం కన్పించడం లేదు. ఏదో ఆశించి కాంగ్రెస్ లో చేరిన ఈ జంటకు తీవ్ర ఆశాభంగం కలిగినట్టు కనిపిస్తోంది. రాజశేఖర్ తాజా చిత్రం "సత్యమేవ జయతే" దారుణంగా ఫ్లాప్ అయింది. ఆ సినిమాలో ఆయన చిరంజీవి మీద, పవన్ కల్యాణ్ మీద సెటైర్లు వేస్తారేమోనని ఆశించిన వారికి ఆశాభంగమే జరిగింది.

ఎటువంటి సినిమా గ్లామర్ లేకపోయినా తన అభివృద్ధి కార్యక్రమాలతో విజయం సాధిస్తానన్న విశ్వాసం రాజశేఖరరెడ్డిది. అందువల్లనే ఆయన జీవిత దంపతులను కూడా లైట్ గా తీసుకుంటున్నారు. రాష్ట్ర మహిళా కాంగ్రెస్ అధ్యక్ష పదవిని జీవిత ఆశించారు. కానీ అనేక కారణాల వల్ల ఆ పదవి ఆమెకు రాలేదు. అయితే తీవ్ర ఆశా భంగం ఆమె మొహంలో స్పష్టంగా కనిపిస్తోంది. చిరంజీవి అభిమానులు కొన్ని నెలల క్రితం ఈ జంటపై దాడి చేసిన విషయం తెలిసిందే. ఆ తర్వాత వాళ్ళు కాంగ్రెస్ కు సన్నిహితం కావడానికి ప్రయత్నం చేశారు. కానీ లాభం లేకుండా పోయింది.