హరికృష్ణ దూరం?

తెలుగుదేశం రాజ్యసభ సభ్యుడు, స్వర్గీయ ఎన్టీ రామారావు కుమారుడు హరికృష్ణ తెలుగుదేశం పార్టీ అధ్యక్షుడు నారా చంద్రబాబునాయుడిపై అలిగారా. ఎన్నికల గాలి వేడెక్కిన వేళ ఆయన తెలుగుదేశం పార్టీ కార్యకలాపాల్లో ఈ మధ్య ఎక్కడా కనిపించకపోవడంతో పలు అనుమానాలు తలెత్తుతున్నాయి. చంద్రబాబుపై అలకనే అందుకు కారణమా, మరేమైనా కారణం ఉందా అనే విషయం కూడా పూర్తిగా తెలియడం లేదు. చంద్రబాబు కుమారుడు లోకేష్ కు తన కూతురు బ్రాహ్మణిని ఇచ్చి పెళ్లి చేసిన తర్వాత బాలకృష్ణ అనివార్యంగానే తెలుగుదేశం పార్టీకి ప్రచారం చేయాల్సి వస్తోందని అంటున్నారు. కాగా, జూనియర్ ఎన్టీఆర్ ను ప్రత్యేకంగా చంద్రబాబు దగ్గరికి తీసి ఎన్నికల ప్రచారంలోకి దించడం స్వర్గీయ ఎన్టీ రామారావు కుటుంబంలోని కొందరికి నచ్చడం లేదని తెలుస్తోంది. జూనియర్ ఎన్టీఆర్ కుటుంబం విషయంలో మీడియా సమావేశాల్లో ప్రశ్నలు తలెత్తే అవకాశం కూడా లేకపోలేదని, అది హరికృష్ణ ప్రచారంలోకి ముందుకు రావడం లేదని అంటున్నారు.

అయితే, కేంద్ర మంత్రి, కాంగ్రెస్ లోకసభ అభ్యర్థి, తమ సోదరి పురంధేశ్వరిపై తెలుగుదేశం నాయకులు తీవ్రంగా ధ్వజమెత్తుతున్నారు. పురంధేశ్వరి, దగ్గుబాటి దంపతులతో తెలుగుదేశం నాయకులు వివాదానికి దిగుతున్నారు. పురంధేశ్వరిపై ఎంతో గౌరవం ఉన్న హరికృష్ణకు అది నచ్చడం లేదని అంటున్నారు. జూనియర్ ఎన్టీఆర్ రంగప్రవేశానికి ముందు ప్రజల్లోకి వెళ్లి హడావిడి చేసిన నందమూరి హీరోలు కళ్యాణ్ రామ్, తారకరత్నల చడీచప్పుడు లేదు. జూనియర్ ఎన్టీఆర్ వల్లనే వారు దూరంగా ఉంటున్నారా అనే సందేహం కూడా వ్యక్తమవుతోంది. మొత్తం మీది స్వర్గీయ ఎన్టీఆర్ కుటుంబంలో కలతలు తీవ్రంగా ఉన్నట్లు ప్రచారం జరుగుతోంది.