సోనియా గాంధీకి కోస్తా, రాయలసీమ షాక్

సోనియా గాంధీని తెలంగాణ కాంగ్రెస్ ఎంపీలు, సీనియర్ నాయకులూ బోల్తా కొట్టించారా? తెలంగాణ రాష్ట్ర సమితి అధ్యక్షుడు కెసిఆర్ కు, ప్రత్యేక తెలంగాణ రాష్ట్రానికి కాంగ్రెస్ నాయకులు పరోక్షంగా సహాయం చేస్తూ వచ్చారు. ఆ ధైర్యంతోనే కెసిఆర్ ఆమరణ నిరాహార దీక్షకు దిగారు. తెలంగాణకు చెందిన రెడ్డి, మున్నూరు కాపు కులాలకు చెందిన కాంగ్రెస్ నాయకులు ఒక పథకం ప్రకారం సోనియాగాంధీకి ఒకరి తర్వాత ఒకరు కర్ణ పిశాచిలా పనిచేసి చివరికి అమ్మగారి పుట్టినరోజున కేంద్ర హోంమంత్రి చిదంబరంతో ప్రకటన చేయించారు.

సామాజికంగా, ఆర్ధికంగా తెలంగాణ వెనుకబడిన మాట వాస్తవమే. కానీ సరైన సమయంలో కాకుండా సోనియాగాంధీ తెలంగాణ డిమాండ్ కు తలొగ్గారన్న విమర్శలు వస్తున్నాయి. ఇప్పుడు తెలంగాణ తీర్మానాన్ని అసెంబ్లీలో ప్రవేశపెడతారా లేదా అన్నది ప్రశ్నార్ధకమైంది. ఇప్పటికే వందమందికి పైగా ఎమ్మెల్యేలు ఎమ్మెల్సీలు తెలంగాణకు వ్యతిరేకంగా రాజీనామాలు సమర్పించారు. కోస్తా ఆంధ్ర, రాయలసీమలకు చెందిన ఎమ్మెల్యేలు ఎంపీలపై రాజీనామాలు చేయవలసిందిగా ఆయా ప్రాంతీయ ప్రజా సంఘాలు, మేధావులు ఆందోళనను తీవ్ర తరం చేస్తున్నారు. రేపు విజయవాడ, విశాఖపట్నం, రాయలసీమ బంద్ కు సన్నాహాలు జరుగుతున్నాయి.