'జ్యోతి'కి జూనియర్ తో ఏం పని?

ఆంధ్రజ్యోతి ఎండీ రాధాకృష్ణ జూనియర్ ఎన్టీఆర్ ను పరామర్శించడానికి కిమ్స్ ఆస్పత్రికి వెళ్ళడం ఆ పత్రిక వరకు టాప్ న్యూస్ అయిపోయింది. గతంలో మోపెడ్ పైన (సైకిల్ మీద కాదని రాధాకృష్ణే చెప్పుకున్నారు) వార్తలు కవర్ చేసి, ఇంటర్వ్యూలు చేసి గొప్ప శ్రామిక పాత్రికేయుడిగా, పాత్రికేయ శ్రామికుడిగా పేరు గడించుకున్నారాయన. కిరోసిన్, బియ్యం స్మగ్లింగ్ చేసుకుని ఆ డబ్బుతో చదువుకున్న బుద్ధిమంతుడాయన. తన బుద్ధి బలంతో తాను పనిచేసిన ఆంధ్రజ్యోతి సంస్ధను పునరుజ్జీవింపజేసి ఈనాడు కోట్లకు పడగనెత్తినవారాయన. అంతటి గొప్ప వ్యక్తి జూనియర్ ను రెండోసారి పరామర్శించడానికి వచ్చారంటే అది మామూలు విషయమా? చాలా గొప్ప విశేషం.

జూనియర్ ఎన్టీఆర్ తాను తెలంగాణలో పుట్టి పెరిగానని, ఈ ప్రాంతంలో ప్రచారం చేయాలనుకున్న సమయానికి యాక్సిడెంట్ జరిగిందని రాధాకృష్ణకు ఇచ్చిన "ప్రత్యేక" ఇంటర్వ్యూలో బాధ పడ్డారు. రాధాకృష్ణ కూడా తాను తెలంగాణలోనే పుట్టి పెరిగానని తన ఆత్మకథలో రాసుకున్నారు. ఎవరు ఎక్కడ పుట్టారన్నది కాదు, సమాజానికి ఏం చేస్తున్నారన్నది ప్రధానం.

సెటిలర్ల గురించి నానా రకాలుగా మాట్లాడే వారు ఈ విషయాన్ని నిగూఢంగా ఆలోచించాలి. తన సినిమా కెరీర్ ను పణంగా పెట్టుకుని ఎండల్లో తిరిగి ప్రచారం చేసి తన మాట నిలబెట్టుకుని ఎన్టీఆర్ త్రికరణ శుద్ధిగా ఉన్నారు. స్వార్ధపర శక్తుల నుంచి ఆయన బయటపడాలంటే ఆస్పత్రి నుంచి డిశ్చార్జ్ అయ్యాక ఆయన హనుమాన్ చాలీసా చేసుకోవడం మంచిది.