జగన్ లింక్స్

దివంగత నేత వైయస్ రాజశేఖర రెడ్డి కుమారుడు వైయస్ జగన్ ముఖ్యమంత్రి పదవికి అర్హుడని, అందుకు సమర్థుడని హీరో నాగార్జున చేసిన వ్యాఖ్య ఎవరినీ ఆశ్చర్యపరచలేదు. అయితే జగన్ తో నాగార్జునకు ఉన్న సంబంధంపై చాలా చెవులు కొరుక్కుంటూనే ఉన్నారు. చిరంజీవి ప్రజారాజ్యం పార్టీ స్థాపించినప్పుడే నాగార్జున వైయస్ ప్రభుత్వానికి మద్దతు ప్రకటించి తన విధేయతను ప్రకటించుకున్నారు. అత్యంత ప్రీతిపాత్రమైన మిత్రుడు చిరంజీవిని కాదని వైయస్ శిబిరంలోకి నాగార్జున మారిపోవడం చాలా మందికి ఆశ్చర్యం కలిగించింది. దీని వల్ల నాగార్జున వైయస్ జగన్ కు సన్నిహితంగా ఉండడంలో ఆశ్చర్యమేమీ లేదు.

అయితే ఆ సంబంధానికి వ్యాపార లావాదేవీలు అంటగడుతున్నారు. రియల్ ఎస్టేట్ వ్యాపార సంబంధాలే నాగార్జున ప్రకటనకు కారణమనే వ్యాఖ్యలు వినిపిస్తున్నాయి. ముఖ్యమంత్రిగా జగన్ అర్హుడని చెప్పడానికి రియల్ ఎస్టేట్ వ్యాపారంలో ఆయన సమర్థతను ఒక కారణంగా చూపుతుండడం బహిరంగ రహస్యమే. నాగార్జున చాలా కాలం నుంచి రియల్ ఎస్టేట్ వ్యాపారం సాగిస్తున్నారని, ఇందులో ఆయన సీనియర్ నటుడు మురళీమోహన్ ను ఆదర్శంగా తీసుకున్నారని, జగన్ తో రియల్ ఎస్టేట్ వ్యాపారానికి సంబంధించిన సంబంధాలు నాగార్జునకు ఉన్నాయని, అందుకే జగన్ ను ముఖ్యమంత్రి పదవిలో చూడాలని ఆయన కోరుకుంటున్నారని టాలీవుడ్ వర్గాలే కాదు, రాజకీయ వర్గాలు కూడా గుసగుసలాడుతున్నాయి. జగన్ ను ముఖ్యమంత్రి పదవిలో చూడడానికి నాగార్జునకు చాలా కాలమే పట్టేట్లుందని వ్యాఖ్యానిస్తున్నారు.