ప్రజారాజ్యంతో 'మ్యాచ్ ఫిక్సింగ్'?

చిరంజీవి ప్రజారాజ్యం పార్టీపై భారతీయ జనతా పార్టీ కన్ను కూడా పడింది. చిరంజీవికి మంచి మిత్రుడైన బిజెపి ఎంపీ, ప్రముఖ నటుడు శతృఘ్న సిన్ హాను ఆ పార్టీ రంగంలోకి దింపింది. చిరంజీవిపార్టీకి ముప్పై నుంచి నలభై అసెంబ్లీ స్ధానాలు వచ్చే అవకాశం ఉండడంతో వైఎస్ దృష్టి కూడా పీఆర్పీ మీద ఎప్పటి నుంచో ఉంది. కొంతమంది పీఅర్పీ అసెంబ్లీ అభ్యర్ధులకు కాంగ్రెస్ పార్టీ లోపాయికారీగా ఆర్ధిక సహాయం చేసినట్టు విన్పిస్తోంది. ఆర్ధిక సహాయం పొందిన 11 మంది పీఅర్పీ కాబోయే ఎమ్మెల్యేలు కాంగ్రెస్ లోకి జంప్ జనార్ధన్ లు కానున్నారని తెలుస్తోంది. గతంలో తీసుకున్న అడ్వాన్స్ కాక పదికోట్ల రూపాయలు, మంత్రి పదవులు ఇవ్వడానికి వైఎస్ మేనేజర్లు అంగీకరించినట్టు ప్రచారం జరుగుతోంది.

అభ్యర్ధులతో విడివిడిగా కాకుండా గంపగుత్తగా పీఅర్పీ కాంగ్రెస్ కు మద్దతు ఇచ్చేలా పెద్ద స్ధాయిలో పావులు కదులుతున్నాయి. అల్లు అరవింద్ ఇప్పటికే కాంగ్రెస్ నాయకుడు కెవిపి రామచంద్రరావుతో ఒక డీల్ కుదుర్చుకున్నట్టు కన్పిస్తోంది. అల్లు అరవింద్, చిరంజీవి ఎన్డీయేకు ఇప్పటి వరకు అనుకూలంగా లేరు. డీల్ కుదిరితే యుపియేతోనే కుదరవచ్చు. ప్రజారాజ్యం ఎమ్మెల్యేలు, ఎంపీల క్యాంప్ కోసం శామీర్ పేటలో ఒక రిసార్ట్ ను బుక్ చేసినట్టు చెబుతున్నారు.