జెపితో బాబు పేచీకి కారణం?

తన మీద కులం ముద్ర పడకుండా ఉండేందుకు లోక్ సత్తా అధ్యక్షుడు జయప్రకాష్ నారాయణ మొదటి నుంచి జాగ్రత్తలు తీసుకుంటున్నారు. ఆయన లోక్ సత్తా పార్టీ పెట్టినప్పుడు, మొన్న ఎన్నికల సమయంలో కూడా చంద్రబాబు నాయుడి నుంచి ఆయనకు అనేక ఆఫర్లు వెళ్ళాయట. లోక్ సత్తా దాదాపు అన్ని స్ధానాల్లో పోటీ చేయడం వల్ల ఒక కులం ఓట్లే కాకుండా విద్యావంతుల ఓట్లు కూడా చీలిపోయే అవకాశముందని, దీనివల్ల రెండు పార్టీలకు నష్టం ఉంటుందని చంద్రబాబు నచ్చజెప్పినట్టు తెలుస్తోంది. ఎన్టీఆర్ కు వెన్నుపోటు పొడిచిన చంద్రబాబుకు నైతిక విలువలు లేవని, ఆయన ఎవరినైనా మోసం చేయగలరని జెపి ప్రగాఢ విశ్వాసమని ఆయన సన్నిహితులు చెబుతుంటారు.

మార్పు తేవడానికే లోక్ సత్తా ఆవిర్భవించిందని చెప్పుకుంటూ చంద్రబాబుతో చేతులు కలిపితే అపహాస్యం పాలవుతామని జెపి భావించారు. లోక్ సత్తా క్రమంగా బలపడడం, చాలా నియోజకవర్గాల్లో ఆ పార్టీకి గట్టి పునాదులు పడడం చంద్రబాబుకు కంటగింపుగా ఉందట. అందుకే ఆయన లోక్ సత్తా కాంగ్రెస్ తో కుమ్మక్కయిందని, కోట్లాది రూపాయల డబ్బు తీసుకుందని ఆరోపించారు. దీనిపై తీవ్రంగా స్పందించవలసిందిగా తమ నాయకులను జెపి ఆదేశించారు. వచ్చే ఎన్నికల నాటికి తెలుగుదేశం బాగా క్షీణించిపోయి లోక్ సత్తా ప్రజారాజ్యం బాగా పుంజుకుంటాయని ఒక అంచనా.