'సాక్షి' సందడి

సాక్షి దినపత్రిక వ్యవహారాల పట్ల కాంగ్రెసు పార్లమెంటు సభ్యుడు, ముఖ్యమంత్రి తనయుడు, ఆ పత్రిక అధినేత వైయస్ జగన్మోహన్ రెడ్డి తీవ్ర అసంతృప్తితో ఉన్నట్లు ప్రచారం జరుగుతోంది. డబ్పులు ఎంత కాలం కుమ్మరించాలనే ఆవేదనతో ఆయన ఉన్నట్లు చెబుతున్నారు. ఇతర ప్రాజెక్టుల్లో వచ్చిన సొమ్ములను సాక్షి పత్రిక కోసం మంచినీళ్ల ప్రాయంలా ఖర్చు పెట్టడం ఇక ఎంతో కాలం సాధ్యం కాదని ఆయన అనుకుంటున్నట్లు చెబుతున్నారు. సిఇఎ సజ్జల రామకృష్ణారెడ్డిపై ఈ విషయంలో ఒత్తిడి పెరుగుతున్నట్లు సమాచారం. సాక్షిలో కొద్ది మందికి లక్షల రూపాయల జీతాలు, చాలా మందికి వేలాది రూపాయల జీతాలు చెల్లిస్తున్నారు.

జీతాల సొమ్ములను చూసి మురిసిపోవడం తప్ప అక్కడ ఏమీ లేదనేవారు కూడా ఉన్నారు. ఆ పత్రికలో ఉద్యోగాల కోసం ప్రయత్నించి భంగపడినవారే ఆ మాటలు అంటుండవచ్చు గానీ అందులో పిసరంతైనా నిజం ఉంటందనే వారు కూడా ఉన్నారు. ఇప్పటి వరకు ఎబిసి రాకపోవడం జగన్ ను కలవరపెడుతున్నట్లు చెబుతున్నారు. సాక్షి పత్రికపై ఇలాంటి దుమారం రావడం ఇదే మొదటిసారి కాకపోయినప్పటికీ ఇది ఈసారి మీడియా వర్గాల్లో పెద్ద యెత్తున ప్రచారంలో ఉంది. చాలా టీవీ చానెళ్లలో బయటకు చెప్పకపోయినప్పటికీ పెద్ద యెత్తున జీతాల్లో కోత విధించారట. అటువంటి కోతే సాక్షిలో కూడా అమలైనా ఆశ్చర్యం లేదని అనేవాళ్లున్నారు.