దిగి వస్తున్న వైఎస్!

రాష్ట్రంలో కాంగ్రెస్ గెలుపుపై ముఖ్యమంత్రి వైఎస్ రాజశేఖరరెడ్డి ధీమా రోజురోజుకు సడలిపోతున్నట్టు కన్పిస్తోంది. నిన్న మొన్నటివరకు రాజకీయాలంటే రంగేసుకుని హీరోయిన్లతో గంతులు వేయడం కాదని వ్యాఖ్యానించిన కాంగ్రెస్ నాయకులు ఇప్పుడు చిరంజీవి వైపు ఆరాధనగా చూస్తున్నారు. చిరంజీవిని ఎప్పుడూ తోటకూరలో పురుగులా తీసేసినట్టు వ్యంగ్యంగా మాట్లాడే రోశయ్య వరుస మారింది. ఆయన స్వరం మారింది. చిరంజీవి కాంగ్రెస్ కు మద్దతు ఇవ్వాలనుకుంటే ఆపడానికి బివి రాఘవులు ఎవరని రోశయ్య ప్రశ్నించారు. రోశయ్య మాట్లాడే ప్రతి మాట వెనుక వైఎస్ ఉంటారన్న విషయం తెలిసిందే. ప్రతిరోజూ సిమ్లాలో ఉన్న వైఎస్ కు రోశయ్యకు మధ్య టెలి కాన్ఫరెన్స్ సాగుతోంది.

కేంద్రంలో యుపిఎ అధికారంలోకి వచ్చే సంకేతాలు కన్పిస్తే 16 వతేదీ మధ్యాహ్నమే తెలంగాణ రాష్ట్ర సమితి అధ్యక్షుడు చంద్రశేఖరరావు రాష్ట్రంలో కూడా కాంగ్రెస్ కూటమికి మద్దతు ప్రకటిస్తారని కాంగ్రెస్ నాయకులు ఆశాభావంతో ఉన్నారు. చిరంజీవి మద్దతు కూడా పొందడానికి ఒక "ప్యాకేజి"ని వైఎస్ శిబిరంలోని మేధావులు సిద్ధం చేసినట్టు తెలుస్తోంది. వచ్చే వారం వైఎస్ హైదరాబాద్ కు తిరిగిరాగానే ఆ ప్యాకేజిని ఫైనలైజ్ చేస్తారు. ఈలోపు ప్రజారాజ్యం ముఖ్యులతో ప్రాధమిక మంతనాలు జరుగుతున్నాయి.