వైయస్ జగన్ పై చర్యలు తప్పవా?

వైయస్ జగన్ మొండితనం ఇప్పుడు కాంగ్రెసు హైకమాండ్ ను ఖంగు తినిపించడం లేదు. అనేక ఎన్నికల యుద్ధాలలో ఆరితేరిన హైకమాండ్ జగన్ ఎత్తులకు పై ఎత్తులు వేస్తోంది. తండ్రి వైయస్ జన్మదినమైన జులై 8 నుంచి జగన్ ఓదార్పు యాత్ర ప్రారంభిస్తే పరిస్ధితులు ఎలా ఉంటాయన్న దానిపై వారు ఇప్పటి నుంచే ప్రైవేటు నిఘా సంస్ధల ద్వారా అంచనా వేయిస్తున్నారు. గతంలో వచ్చిన నివేదికలు జగన్ కు పెద్దగా అనుకూలంగా ఉండకపోవడంతో అధిష్టానం ఓదార్పు యాత్రకు నిరాకరించింది.

ఇప్పుడు చిరంజీవిని దువ్వుకోవడం ద్వారా కాంగ్రెసు హైకమాండ్ జగన్ ను వెక్కిరించినట్టైంది. జగన్ వర్గం ఈ విషయంలో బాధగానే ఉన్నట్టు కన్పిస్తోంది. జగన్ కు ఏదో పైపైన బలం తప్ప అన్నివర్గాల్లో మద్దతు లేదని నిర్ణయించుకున్న తర్వాతే హైకమాండ్ చకచకా పావులు కదుపుతోంది. వైయస్ శవం కూడా బయటికి వెళ్ళక ముందే జగన్ వర్గీయులు జగన్ ను సిఎం ను చేయాలని సంతకాల కార్యక్రమం చేపట్టడాన్ని ఆనాడే అధిష్టానం తీవ్రంగా పరిగణించింది. పవర్ మాంగర్ గా జగన్ పై ముద్రపడింది. జులై 8 నుంచి జగన్ ఓదార్పు యాత్ర సాగించడం మాత్రం ఖాయం. దానిపై అధిష్టానం ఎటువంటి నిర్ణయం తీసుకుంటుందనేది ఇప్పుడే చెప్పలేని విషయం.