జగన్ వల్ల మధ్యంతర ఎన్నికలొచ్చినా సోనియా రెఢీ

వైయస్ జగన్ దుందుడుకుతనం వల్ల రాష్ట్రంలో రోశయ్య సర్కారు పడిపోయి మధ్యంతర ఎన్నికలు వస్తాయా? సెప్టెంబర్ 2న తండ్రి వైఎస్ తొలి వర్ధంతి రోజున జగన్ సొంత పార్టీ పట్టుకోనున్నారా? ఆయనతో కలిసి నడవడానికి 30 నుంచి 40 మంది కాంగ్రెస్ ఎమ్మెల్యేలు సిద్ధంగా ఉన్నారు. శ్రీకుకుళం అనంతరం జగన్ తూర్పు గోదావరి జిల్లాలో ఓదార్పు యాత్రకు వెళ్ళినప్పుడు పై ప్రశ్నల్లో కొన్నిటికి ఖచ్చితంగా జవాబులు లభిస్తాయి.

జగన్ సభల కంటే జూనియర్ ఎన్టీఆర్ కు, అంతకంటే చిరంజీవి సభకు జనం కదిలి వచ్చారన్న సంగతి హైకమాండ్ దృష్టికి వెళ్ళింది. మధ్యంతర ఎన్నికలు వచ్చినా చిరంజీవితో ప్రచారం చేయించుకుని విజయం సాధించవచ్చన్న విశ్వాసంతో హై కమాండ్ ఉంది. కాంగ్రెస్ కు ఉన్న 40 శాతం ఓటు బ్యాంకుకు తోడు చిరంజీవికి ఉన్న 18 శాతం ఓట్లు కలిస్తే కాంగ్రెస్ ప్రజారాజ్యం కూటమి ఘన విజయం సాధిస్తుందన్న నమ్మకంతో సోనియా గాంధీ ఉన్నారు. ధనబలంతో జగన్ సొంత పార్టీ పెట్టుకున్నా ఆయనకు వచ్చే ఓట్లు అతి తక్కువగా ఉంటాయన్న అంచనా ఆమెకుంది.

కాంగ్రెస్ అధిష్టానవర్గానికి , కడప ఎంపీ జగన్‌కూ మధ్య అగాథం పూడ్చలేనంతగా పెరుగుతోంది. రోజు రోజుకూ పదునెక్కుతున్న యువనేత స్వరాన్ని అధిష్ఠానం నిశితంగా గమనిస్తోంది. రోశయ్య సర్కారు పడిపోయినా, మధ్యంతరమే వచ్చినా జగన్ ఒత్తిడికి లొంగరాదనే అది కృత నిశ్చయానికి వచ్చినట్లు తెలుస్తోంది. జగన్ విషయంలో కఠిన వైఖరి ప్రదర్శించాలన్నదే అధిష్ఠానం ఆలోచన. జగన్ బెదిరింపులను వివిధ మార్గాల్లో ఎదుర్కోడానికి హైకమాండ్ సిద్ధమవుతున్నట్టు సమాచారం. కాంగ్రెస్ సీనియర్ నాయకులు చాలా మంది రోశయ్యను కలుసుకుని విధేయత చాటుకోవడం హై కమాండ్ వ్యూహాల ఫలితమేనని తెలుస్తోంది.

ఓదార్పు యాత్ర ధిక్కారంగా భావించేంత తీవ్రమైన విష యం కాదని ముఖ్యమంత్రి రోశయ్య చెబుతున్నప్పటికీ... జగన్ బహిరంగ సభల్లో చేసే వ్యాఖ్యలను మాత్రం అధిష్ఠానం సీరియస్‌గా తీసుకుంటోంది. సోనియా గాంధీ రాష్ట్ర పరిణామాలపై వస్తున్న వార్తలను నిశితంగా పరిశీలిస్తున్నారు.