ముఖ్యమంత్రి అభ్యర్ధిగా డిఎస్!

పిసిసి అధ్యక్షుడు డి. శ్రీనివాస్ కు ముఖ్యమంత్రి పదవి మీద చిరకాల వాంచ ఉన్న సంగతి తెలిసిందే. సోనియా గాంధీకి కూడా ఆయన మీద సానుభూతి ఉంది. 2004 ఎన్నికల సమయంలో ఆయన బలమైన ముఖ్యమంత్రి అభ్యర్ధి. ఆ పదవిని వైయస్ తన వ్యూహ రచనా సామర్ధ్యంతో అలవోకగా ఎగరేసుకుపోయారు. ఏడాది క్రితం జరిగిన ఎన్నికల్లో డిఎస్ ఓడిపోయారు. గెలిచి ఉంటే వైయస్ మరణం తర్వాత ఆయనే ముఖ్యమంత్రి అయి ఉండేవారు. ఇప్పుడైనా ఆయనకు నష్టం లేదు. నిజామాబాద్ అసెంబ్లీ ఉప ఎన్నికలో ఆయన పోటీ చేస్తున్నారు. ఆ ఎన్నికలో గెలిస్తే ఆయన నిస్సందేహంగా ఆయన ముఖ్యమంత్రి అభ్యర్ధి అవుతారు. ఏదైనా పరిస్ధితుల్లో రోశయ్య వైదొలగవలసి వస్తే సోనియా కంటికి గట్టిగా కన్పించేది డిఎస్సే.

డిఎస్ కాంగ్రెస్ అధిష్టానవర్గానికి వీర విధేయుడు. రాజీవ్ గాంధీ డైరీలోని వీర విధేయుల జాబితాలో డిఎస్ కూడా ఉన్నట్టు కాంగ్రెస్ వర్గాలు చెబుతుంటాయి. సోనియాగాంధీ ఆ డైరీని బైబిల్ లా పాటిస్తారు. తెలంగాణ సెంటిమెంట్ ను నీరుగార్చడానికి కూడా కాంగ్రెస్ హైకమాండ్ కు డీఎస్ అవసరం. ఈ ఎన్నికల్లో కాంగ్రెస్ 12 స్ధానాలకు గాను కనీసం సగం చేజిక్కించుకున్నా ఆ క్రెడిట్ డిఎస్ కు వస్తుంది. కెసిఆర్ మరుగున పడిపోతారు. అయితే కాంగ్రెస్ కు అంత సులభమా? తెలుగుదేశం కూడా రెండు మూడు స్ధానాలో బలంగా ఉన్నట్టు కన్పిస్తోంది. మరో నెల రోజుల్లో దృశ్యం స్పష్టమౌతుంది.