రాష్ట్ర బిజెపి అధ్యక్షుడిగా గాలి జనార్ధన్ రెడ్డి!

ఇది గాలి వార్త అనుకోవద్దు. నిజమయ్యే అవకాశాలున్నాయి. ఆంధ్రప్రదేశ్ బిజెపి ఇన్ చార్జిగా కానీ, రాష్ట్ర శాఖ అధ్యక్షుడిగా కానీ ఆయన వచ్చే అవకాశాలున్నాయి. కర్ణాటక-ఆంధ్రప్రదేశ్ సరిహద్దులో గనుల మాఫియా ద్వారా వందలాది కోట్లు సంపాదించిన గాలి జనార్ధన్ రెడ్డి ఇప్పుడు కర్ణాటకలో పెద్ద నాయకుడు. ఒక ముఖ్యమైన శాఖకు మంత్రి. చిత్తూరు జిల్లా నుంచి కర్ణాటకకు వలస వెళ్ళిన కుటుంబానికి చెందిన వ్యక్తి. ఆయన తండ్రి బళ్ళారిలో హెడ్ కానిస్టేబుల్ గా పనిచేసేవారు. సామాన్య మధ్యతరగతి కుటుంబం నుంచి గాలి జనార్ధన్ రెడ్డి బాగా ఎదిగారు. పార్టీ వేరైనా ఆయనకు వైయస్ రాజశేఖరరెడ్డితో మంచి సంబంధాలు ఉండేవి. ఆయనకు వైయస్ జగన్ తో వ్యాపార సంబంధాలు ఉన్నాయి.

వచ్చే నెలలో జరుగనున్న బిజెపి చింతన్ బైఠక్ లో గాలి జనార్ధన రెడ్డిని ఆంధ్రప్రదేశ్ బిజెపి వ్యవహారాల ఇంచార్జిగా చేసే విషయం ఖరారు కానుంది. కర్ణాటకలో బిజెపి విజయంలో తన ధనబలం ద్వారా కీలకపాత్ర వహించిన గాలి జనార్ధన్ రెడ్డి సేవలను పూర్తి స్ధాయిలో ఆంధ్రప్రదేశ్ లో ఉపయోగించుకోవాలని బిజెపి అగ్ర నాయకత్వం ఆలోచిస్తోంది. అయితే కర్ణాటక ముఖ్యమంత్రి యడ్యూరప్పకు ఒక మంత్రిగా ఇబ్బందిపెడుతున్న గాలి జనార్ధన రెడ్డి సొంత రాష్ట్రమైన ఆంధ్రప్రదేశ్ కు బదిలీ చేయాలనుకుంటున్నట్టు మరో వెర్షన్.