జయప్రద గారాలు, చంద్రబాబు బేరాలు

జయప్రదకు ఇంకా తెలుగుదేశం పార్టీ అధినేత నుంచి అనుకూల సంకేతాలు అందలేదు. ఏడాది క్రితం జరిగిన లోక్ సభ ఎన్నికల్లో ఆమె ఉత్తరప్రదేశ్ లోని రాంపూర్ నుంచి ఎన్నికయ్యారు. అమె ఇప్పుడు తెలుగుదేశం పార్టీలో చేరితే ఫిరాయింపుల నిషేధ చట్టం కింద లోక్ సభ సభ్యత్వాన్ని కోల్పోతారు. తనకు రాజ్యసభ సభ్యత్వం ఇస్తే తన లోక్ సభ పదవికి రాజీనామా చేస్తానని ఆమె షరతు పెట్టినట్టు తెలుస్తోంది. చంద్రబాబు నాయుడు ఇంకా ఈ విషయంలో తుది నిర్ణయం తీసుకోలేదని తెలిసింది. ఉన్న రెండు రాజ్యసభ స్ధానాల్లో ఒక దానికి జయప్రదకు ఇస్తే పార్టీ సీనియర్లు మనస్ధాపం చెందుతారని ఆయన తటపటాయిస్తున్నారు.

చంద్రబాబు నాయుడికి జయప్రద సెంటిమెంట్ బాగా ఉంది. ఆమె ప్రచారం చేసిన రెండు సార్లు తెలుగుదేశం పార్టీ జయప్రదంగా అధికారంలోకి రాగలిగింది. ఆ సెంటిమెంట్ ప్రకారం ఆమెను పార్టీలోకి ఆహ్వానించాలని ఆయన అనుకుంటున్నా ఏకంగా రాజ్యసభ స్ధానం ఇవ్వడానికి ఆయన సిద్ధంగా ఉన్నట్టు కన్పించడం లేదు. జయప్రద రాజకీయ గురువు అమర్ సింగ్ కాంగ్రెస్ లో చేరే అవకాశముంది.