ఈ వయసులో ఎందుకిన్ని కష్టాలు?

మంత్రివర్గ విస్తరణకు సోనియా గ్రీన్ సిగ్నల్ ఇవ్వకపోవడంతో ముఖ్యమంత్రి రోశయ్య ఢీలా పడినట్టు కన్పిస్తోంది. తోక ఎగరేస్తున్న కొందరు మంత్రులను తొలగించి, తన వాళ్ళు అనుకున్నవారిని చేర్చుకోవాలని రోశయ్య ఆకాంక్షించారు. అందుకు హై కమాండ్ అనుమతి లభించలేదు. పిసిసి అధ్యక్షుడు డి శ్రీనివాస్ తనదైన శైలిలో సోనియా గాంధీ చెవిలో చెప్పి మంత్రివర్గ విస్తరణకు అడ్డుపడినట్టు తెలుస్తోంది. దానికి తగినట్టే రోశయ్య కూడా గ్రేటర్ హైదరాబాద్ ఎమ్మెల్సీ బరిలో డీఎస్ ను లేకుండా చేశారు.

రోశయ్యకు పెద్ద అవినీతిపరుడిగా పేరు లేదు. అలాగే పెద్ద పరిపాలనావేత్త కాదు. ఈ సమయంలో కాంగ్రెస్ హైకమాండ్ కు ఇటువంటివారే కావాలి. రోశయ్య విషయంలో చంద్రబాబు నాయుడు కూడా అంతగా నోరు పారేసుకోవడం లేదు. ఇది కూడా హై కమాండ్ వద్ద రోశయ్య స్కోరును పెంచింది. వైఎస్ ముఖ్యమంత్రిగా ఉన్నప్పుడు డిఎస్ పన్నాగాలు పారలేదు. ఇప్పుడు డిఎస్ రోశయ్య మీద పరోక్ష దాడికి దిగారు. సోనియా గాంధీకి డిఎస్ అంటే ప్రత్యేక అభిమానం. ఆమె ఆయన మాటకు కొంత విలువ ఇస్తారు. డిఎస్ తెలంగాణ వాదం గురించి రోశయ్య వర్గీయులు ఒక వాణిని విన్పించినట్టు తెలుస్తోంది. అందుకే ఇప్పుడు డిఎస్ తేలు కుట్టిన దొంగలా కన్పిస్తున్నారు.