రోజా రాజకీయ భవిష్యత్తు?

ఆమె మాటలు ముద్దు ముద్దుగానే కాకుండా ప్రత్యర్ధులను గుద్దులు గుద్దేలా ఉంటాయి. ఈ మధ్య ఆమె క్రియాశీల రాజకీయాలకు దూరంగా ఉండడం ప్రజలకు, టీవీ ప్రేక్షకులకు నష్టమే అని చెప్పాలి. ఆమె ఫైర్ బ్రాండ్ రోజా. తెలుగుదేశం పార్టీకి ఆమె ఒకప్పుడు పెద్ద ఆస్ధి. కొన్ని అనివార్య కారణాల వల్ల ఆమె తెలుగుదేశానికి దూరమై అప్పటి ముఖ్యమంత్రి వైయస్ రాజశేఖరరెడ్డికి దగ్గరయ్యారు. అయితే ఆమె వైయస్ వద్ద లెగ్ పెట్టిన కొన్ని రోజుల్లోనే ఆయన అకస్మిక ప్రమాదంలో మృతి చెందారు. వైయస్ బతికి ఉంటే రోజా ఈ రోజున అద్భుతమైన పదవిలో వెలుగుతూ ఉండేది. విధిరాతను ఎవరూ తప్పించలేరు. వైయస్ జగన్ రాష్ట్ర రాజకీయాల్లో కీలక భూమిక వహించే రోజు వస్తే ఆ రోజులన్నీ రోజావే అవుతాయి. అయినా అసెంబ్లీ ఎన్నికలు సమీపంలో లేవు కాబట్టి ఆమె తొందరపడడం లేదు. బుల్లి తెర కార్యక్రమాల్లో, పెద్ద తెర పాత్రల్లో ఆమె బిజీగా ఉన్నారు.

తెలుగుదేశం పార్టీతో కూడా ఆమె సంబంధాలు పూర్తిగా తెగిపోలేదు. ఆమె మళ్ళీ వస్తుందన్న ఆశతోనే చంద్రబాబు నాయుడు జయప్రదకు గ్రీన్ సిగ్నల్ ఇవ్వడం లేదు. కాంగ్రెసు పరిస్ధితులు ఇలాగే ఉంటే చంద్రబాబు నాయుడు మళ్ళీ ముఖ్యమంత్రి కావడం ఖాయమన్న అభిప్రాయం పరిశీలకుల్లో ఉంది. ఈ నేపధ్యంలో రోజా ఆచితూచి వ్యవహరిస్తోంది. ప్రసంగాల విషయంలో ఆమెకు ఏ మహిళా నాయకురాలూ సాటిరారు. ఆమె ఏ పార్టీలో ఉన్నా ఆ పార్టీకి ఆస్ధిగా ఉంటారు.