చిరంజీవి సినిమాల్లోకి తిరిగి రానున్నారా?

చిరంజీవి మళ్ళీ సినిమాల్లో నటించనున్నారా? రాజకీయాల్లో నటన ఆయన సృజనాత్మకతకు, కళాభినివేశానికి ఆనుతున్నట్టు కన్పించడం లేదు. రాజకీయాల్లో పైపైన ఎంత నటించినా హిట్ లు రావడం లేదని ఆయనకు బెంగపట్టుకున్నట్టుంది. అసెంబ్లీ ఎన్నికల కోసం మరో నాలుగున్నరేళ్ళు వేచి చూడడమంతే పల్లెటూరి థియేటర్ లో కరెంటు పోయి గంట ఇంటర్వెల్ తీసుకుంటున్నట్టుగా ఆయనకు యమ బోర్ గా ఉంది. ఈలోపు సరదాగా ఓ నాలుగు సినిమాలు వేసుకుంటే పోలా అన్న ఆలోచనా ధోరణికి ఆయన వచ్చినట్టు సన్నిహితులు చెబుతున్నారు. మళ్ళీ సినిమాల్లో నటించడం కోసమే, స్లిమ్ గా కన్పించడం కోసమే ఆయన లైపో సక్సన్ అనే కొవ్వు తీయించుకునే చికిత్స చేయించుకున్నట్టు సమాచారం. గతంలో ఇటువంటి చికిత్సను జూనియర్ ఎన్టీఆర్, మంచు విష్ణువర్ధన్ చేయించుకుని స్లిమ్ గా తయారయ్యారు. ఇటీవలే ఈ చికిత్స చేయించుకున్న తర్వాత చిరంజీవి నవ యువకుడిలా కన్పిస్తున్నారు.

చిరంజీవి తనకెంతగానో కలిసొచ్చిన సినిమా రంగాన్ని వదులుకుని రాజకీయాల్లోకి రావడానికి గల ప్రధాన కారణాల్లో ఒకటి తన కుటుంబంలోని యంగ్ తరంగ్ హీరోలకు దారి ఇవ్వాలన్నది. మరి ఇప్పుడు ఆయన సినిమాల్లో నటిస్తే వారి దారి సన్నదై పోదా? ముమ్మటికీ పోదు. ఎందుకంటే చిరంజీవి తాను మాత్రమే చేయగల చారిత్రక, ఆఫ్ బీట్ సినిమాల్లో నటించాలనుకుంటున్నారు. ఎన్టీఆర్ కూడా ప్రతిపక్ష నాయకుడిగా ఉండగా బ్రహ్మర్షి విశ్వామిత్ర సినిమాలో నటించి తన అభిమానుల అభిమానాన్ని కొనసాగించుకున్నారు. చిరంజీవి కూడా ఉయ్యాలవాడ నరసింహారెడ్డి జీవిత కథ ఆధారంగా నిర్మించే చిత్రంలో నటించాలని చిరకాలంగా అనుకుంటున్నారు. ఇప్పుడు ఆయన కల నెరవేరే సమయం ఆసన్నమైనట్టే కన్పిస్తోంది.