వైఎస్ హెలికాప్టర్ ప్రమాదం వెనుక కుట్ర లేదు!

వైఎస్ రాజశేఖరరెడ్డి హెలికాప్టర్ ప్రమాదం ప్రతికూల వాతావరణ వల్లనే జరిగిందని త్యాగి కమిటీ ప్రభుత్వానికి నివేదించినట్టు తెలిసింది. 2009 సెప్టెంబర్ 2న వైఎస్ ప్రయాణిస్తున్న హెలికాప్టర్ కూలిపోవడం వెనుక ఎటువంటి కుట్ర లేదని దీనిని బట్టి తెలుస్తోంది. వైఎస్ హెలికాప్టర్ ప్రమాదంపై దర్యాప్తు కోసం పవన్ హన్స్ అధిపతి ఆర్ కె త్యాగి నాయకత్వంలోని కమిటీ శుక్రవారం విమానయాన మంత్రిత్వశాఖ కార్యదర్శికి నివేదిక సమర్పించినట్టు తెలుస్తోంది. ప్రభుత్వం ఈ నివేదికను బహిర్గతం చేసిన తర్వాత పూర్తి వివరాలు తెలుస్తాయి. నివేదిక సారాంశమైతే ఆ హెలికాప్టర్ ప్రమాదం అధిక వేగం, ప్రతికూల వాతావరణం వల్లనే జరిగిందని. కుండపోత వర్షం కారణంగా దారి కన్పించక హెలికాప్టర్ దారితప్పి కొండను ఢీకొందని నివేదికలో స్పష్టం చేసినట్టు తెలిసింది.

వైఎస్ చాపర్ ప్రమాదం వెనుక ఒక కార్పొరేట్ సంస్ధ కుట్ర దాగి ఉందని ఒక తెలుగు టీవీ చానల్ నానా యాగీ చేసి వివాదాస్పదమైన విషయం తెలిసిందే. ఈ కేసులో ఆ చానల్ ఎడిటర్లు అరెస్టై విడుదలయ్యారు. ఆ చానల్ నివేదిక కారణంగా వైఎస్ అభిమానులు రెచ్చిపోయి సదురు కార్పొరేట్ సంస్థ దుకాణాల మీద దాడులు చేశారు.