తెలంగాణ బంతికి అజర్ చిట్కా

By Pratap

Published: Tuesday, May 29, 2012, 12:02 [IST]

బౌలర్ వేసిన బంతిని బౌండరీ దాటించడమెలాగో తెలిసి మాజీ క్రికెటర్, కాంగ్రెసు పార్లమెంటు సభ్యుడు మొహమ్మద్ అజరుద్దీన్ తెలంగాణ బంతిని బౌండరీ దాటించడానికి ఓ చిట్కా చెప్పారు. ఆయన చిట్కా ఏమిటో తెలిస్తే ఇంత సులభమా అని ముక్కున వేలేసుకోక తప్పదు. తెలంగాణ విషయంపై తమ పార్టీ అధ్యక్షురాలు సోనియా గాంధీకి, ఆమె కుమారుడు రాహుల్ గాంధీకి చెప్తే అయిపోతుంది కదా అని ఆ మాట అనేశారు. అసలు తెలంగాణ బంతి సోనియా కోర్టులోనే ఉందన్న విషయం అజర్‌కు తెలుసో, లేదో. సోనియా తలుచుకుంటే అది అయిపోతుంది, ఆ విషయం సోనియాకు తెలియంది కాదు.

తెలంగాణ, 14ఎఫ్‌లపై ప్రాంతాలకు అతీతంగా కాంగ్రెసు పార్లమెంటు సభ్యులు మాట్లాడుకుంటూనే ఉన్నారు. ఆ మాటల్లో ఆజర్ కూడా ఓ మాట పడేశారు. కోమటిరెడ్డి రాజగోపాల్ రెడ్డి, లగడపాటి రాజగోపాల్ మాట మాట కలిపారు. సాయంత్రం కోట్ల సూర్యప్రకాశ్ రెడ్డి, జెడి శీలం, అజరుద్దీన్, కోమటిరెడ్డి చర్చలు సాగించారు. తెలంగాణలో భావోద్వేగాలున్నప్పటికీ, ఇప్పుడు సీమాంధ్రలో కూడా భావోద్వేగాలున్నాయని ఓ ఎంపి అన్నప్పుడు ఇవన్నీ ఎందుకు మేడమ్, రాహుల్‌లతో మాట్లాడితే తేలిపోతుంది కదా అని అజర్ తేలిగ్గా ఓ మాట అనేశారు.

Published On May 29, 2012