జగన్ ఎమ్మెల్యేలకు 'బొత్స' చిక్కు

By Srinivas

Published: Sunday, November 20, 2011, 10:29 [IST]

వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యుల రాజీనామాలపై ఇప్పటి వరకు స్పీకర్ నాదెండ్ల మనోహర్ దృష్టి సారించారు. ఇప్పటి వరకు స్పీకర్ విచారించిన అందరూ దాదాపు రాజీనామాలపై ఆయన నిర్ణయానికే వదిలేశారు. చాలామంది ఎమ్మెల్యేలు జగన్‌కు షాక్ ఇస్తూ కాంగ్రెసులోకి వెళ్లే అవకాశాలే కనిపిస్తున్న నేపథ్యంలో వారి రాజీనామాలపై ఇక పిసిసి చీఫ్ బొత్స సత్యనారాయణ దృష్టి సారించనున్నారు. జగన్ వర్గం నేతలు ఎమ్మెల్యేతో పాటు పార్టీ ప్రాథమిక సభ్యత్వానికీ రాజీనామా చేశారు. దానిపై ఆయన రెండుమూడు రోజుల్లో ఆరా తీయనున్నారు.

అదే సమయంలో ఆయన కాంగ్రెసులోకి వస్తామంటున్న ఎమ్మెల్యేలు కలెక్టరేట్‌లలో పని చేసుకు పోతే కుదరదని కాంగ్రెసు పార్టీ కార్యాలయాలకు రావాల్సిందేనని కుండబద్దలు కొట్టినట్లు చెబుతున్నారు. అలాగే పార్టీ కార్యక్రమాలలోనూ చురుగ్గా పాల్గొనాలని సూచిస్తున్నారు. రాజీనామాలపై వారిని ప్రశ్నించే ముందు ఇదే విషయాన్ని వారి దృష్టికి తీసుకు వెళ్లే అవకాశాలు ఉన్నాయి. అయితే స్పీకర్ ముందు తమ రాజీనామాల విషయంలో ఆచితూచి మాట్లాడుతున్న జగన్ ఎమ్మెల్యేలు బొత్సతో ఎలా ప్రతిస్పందిస్తారో చూడాలి.

Published On November 20, 2011