బాబుకు ఢిల్లీ కాల్ ఎవరి నుంచి?

By Pratap

Published: Wednesday, August 17, 2011, 8:47 [IST]

అన్నా హజారే అరెస్టుకు నిరసనగా తెలుగదేశం పార్టీ అధ్యక్షుడు నారా చంద్రబాబునాయుడు ఆఘమేఘాల మీద రోడ్డుపైకి వచ్చారు. చంద్రబాబు అలా రావడం వెనక ఓ జాతీయ నాయకుడి పాత్ర ఉందని అంటున్నారు. పార్టీ విస్తృత స్థాయి సమావేశంలో ఉన్న చంద్రబాబుకు ఢిల్లీ నుంచి ఓ కాల్ వచ్చిందట. వెంటనే ఆయన పక్కకు వెళ్లిపోయి దాదాపు 15 నిమిషాల పాటు మాట్లాడరట. ఆ తర్వాత వచ్చేసి అన్నా హజారే అరెస్టుపై చర్చిద్దామని నాయకులకు చెప్పారని సమాచారం.

అన్నా అరెస్టుపై ఏ మాత్రం చర్చించకుండానే ఐదు నిమిషాల్లోనే రోడ్డుపైకి నాయకులతో పాటు దారి తీశారని అంటున్నారు. చంద్రబాబు అకస్మాత్తు నిర్ణయానికి పార్టీ నాయకులు కూడా బిత్తరపోయారని అంటున్నారు. ఢిల్లీ అంతా ఉడికిపోతుంటే అలా చర్చలు అంటూ కూర్చోవడం పనికి రాదని, దీపం ఉండగానే ఇల్లు చక్కబెట్టుకోవాలన్నట్లు వెంటనే రోడ్డుపైకి రావాలని చంద్రబాబుకు ఆ జాతీయ నాయకుడు నూరిపోసిన వైనమే దీనికి దారి తీసిందని అంటున్నారు. ఇంతకీ ఆ జాతీయ నాయకుడు ఎవరనేది ఇప్పటికీ మిస్టరీగానే ఉంది.

Published On August 17, 2011