జూ ఎన్టీఆర్‌కు చంద్రబాబు భయపడ్డారా?

By Pratap

Published: Monday, May 30, 2011, 9:25 [IST]

సినీ హీరో జూనియర్ ఎన్టీఆర్‌కు తెలుగుదేశం పార్టీ అధ్యక్షుడు నారా చంద్రబాబు నాయుడు భయపడ్డారా అనే అనుమానాలు కలుగుతున్నాయి. జూనియర్ ఎన్టీఆర్ పార్టీ మహానాడుకు డుమ్మా కొట్టడం, ఆయన తండ్రి నందమూరి హరికృష్ణ అలక బూనడం చంద్రబాబును ఇరకాటంలో పెట్టింది. మహానాడు వేదికపై నందమూరి కుటుంబ సభ్యుల ఫ్లెక్సీలు లేకపోవడం అటుంచి, చంద్రబాబు కుమారుడు నారా లోకేష్ ఫ్లెక్సీలు కనిపించడం పెద్ద దుమారాన్నే రేపింది. పరిస్థితి గమనించిన చంద్రబాబు వెనక్కి తగ్గారు.

మహానాడు చివరి రోజు వేదికపై నందమూరి కుటుంబ సభ్యుల ఫ్లెక్సీలను పెట్టారు. అంతేకాకుండా, నారా లోకేష్ రాజకీయాల్లోకి రావాలంటూ తీర్మానం చేసిన చిత్తూరు జిల్లా నాయకులపై ఆయన అగ్గి మీద గుగ్గిలమయ్యారు. చంద్రబాబు ప్రసంగం కూడా చివరి రోజు కొంత ఆత్మపరిశీలన పద్ధతిలో సాగింది. స్వర్గీయ ఎన్టీఆర్‌ను గద్దె దింపడం తప్పేనని అంగీకరించారు. అయితే, ఆ దుష్టశక్తి నుంచి పార్టీని కాపాడుకోవడానికి అది తప్పలేదని సమర్థించుకున్నారు. ఈ మాటలు హరికృష్ణను మెప్పించడానికి మాత్రమేనని అంటున్నారు. ఏమైనా, జూ. ఎన్టీఆర్, హరికృష్ణ దెబ్బకు బాబు వెనక్కి తగ్గక తప్పలేదు.

Published On May 30, 2011