బొత్సకు చిరంజీవి ఝలక్

By Pratap

Published: Wednesday, August 24, 2011, 9:37 [IST]

ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణకు కాంగ్రెసు కొత్త కాపు చిరంజీవి ఝలక్ ఇవ్వజూశారు. సత్తిబాబుగారు ఏమీ తక్కువ తినలేదు కదా, అదే స్థాయిలో చిరంజీవికి షాక్ ఇవ్వడానికి చూశారు. ఇటీవల కాంగ్రెసు కార్యాలయం గాంధీభవన్‌లో ప్రజారాజ్యం పార్టీ శాసనసభ్యులు, ముఖ్య నేతలు కాంగ్రెసు తీర్థం పుచ్చుకునే కార్యక్రమం జరిగిన విషయం తెలిసిందే. అదే రోజు చిరంజీవి ఢిల్లీ నుంచి హైదరాబాదు చేరుకున్నారు. హైదరాబాదు విమానాశ్రయం నుంచి ఆయన నేరుగా గాంధీభవన్‌కు రావాల్సి ఉంది. అయితే చక్కా ఇంటికి చెక్కేశారు.

చిరంజీవి కోసం బొత్స గారు ఫోన్ చేస్తే విలీన కార్యక్రమాన్ని మీరే కానిచ్చేయండని చెప్పారట. దాంతో కోపం నశాళానికి ఎక్కిన బొత్స సత్యనారాయణ, కార్యక్రమం వాయిదా వేద్దామని సూచించారని తెలిసింది. దాంతో కంగు తిన్న చిరంజీవి తాను వస్తున్నానంటూ చెప్పారట. చిరంజీవి రాక కోసం బొత్స సత్యనారాయణ గంటన్నరకు పైగా కళ్లు కాయలు కాసేలా ఎదురు చూడాల్సి వచ్చింది.

Published On August 24, 2011