చిరంజీవికి కాంగ్రెసు మెగా షాక్

By Pratap

Published: Sunday, May 29, 2011, 10:48 [IST]

కాంగ్రెసులో పార్టీని విలీనం చేయడానికి నిర్ణయం తీసుకోవడం వల్ల ప్రజారాజ్యం పార్టీ అధినేత చిరంజీవి దశ తిరిగిందని అనుకున్నారు. కానీ, అసలుకే ఎసరు పెట్టేందుకు కాంగ్రెసు అధిష్టానం సిద్ధపడినట్లు వినికిడి. గవర్నర్ కోటా కింద ఓ ఎమ్మెల్సీ సీటును ప్రజారాజ్యం పార్టీకి ఇస్తారని అనుకున్నారు. చిరంజీవి ఒకటి తలిస్తే కాంగ్రెసు అధిష్టానం మరోటి చేసింది. గవర్నర్ కోటా కింద ఎంపిక చేసేందుకు ఖరారు చేసిన ఐదుగురు ఎమ్మెల్సీ అభ్యర్థుల్లో ప్రజారాజ్యం పార్టీకి చోటు దొరకలేదు. చిరంజీవి స్వయానా నడుం కట్టుకుని ప్రయత్నాలు చేసినా ఫలితం సున్నానే అయింది.

గవర్నర్ కోటా కింద కోటగిరి విద్యాధర రావును ఎమ్మెల్సీగా ఎంపిక చేయాలని చిరంజీవి కాంగ్రెసు అధిష్టానాన్ని కోరారు. మరోవైపు మరో ప్రజారాజ్యం అధినేత వేదవ్యాస్ కూడా ముమ్మరంగానే ప్రయత్నాలు సాగించారు. మాజీ కాంగ్రెసు నాయకుడైన వేదవ్యాస్ పూర్వ పరిచయాలతో కాలికి బలపం కట్టుకుని తిరిగారు. కానీ ఇద్దరిని కూడా కాంగ్రెసు అధిష్టానం పట్టించుకోలేదు. చిరంజీవి వల్ల బ్రహ్మాండం బద్దలవుతుందని అనుకున్న కాంగ్రెసు అధిష్టానం కడప ఉప ఎన్నికల ఫలితాలతో అదే కాదని తేల్చేసుకుందని వినికిడి. ఏమైనా, చిరంజీవి పరుల మీద ఆధారపడాల్సిన స్థితిలోకి వచ్చారు.

Published On May 29, 2011