వైయస్ వివేకా అల్లుడికి మొండిచేయి

By Pratap

Published: Wednesday, April 6, 2011, 10:18 [IST]

కడప లోకసభ స్థానంలో వైయస్సార్ కాంగ్రెసు పార్టీ నాయకుడు వైయస్ జగన్‌పై పోటీకి ఉవ్విళ్లూరిన మంత్రి వైయస్ వివేకానంద రెడ్డి అల్లుడు నర్రెడ్డి రాజశేఖర రెడ్డికి నిరాశే ఎదురైంది. ఆయనకు కాంగ్రెసు పార్టీ అధిష్టానం మొండిచేయి చూపింది. తన అల్లుడికి టికెట్ ఇవ్వాలని వైయస్ వివేకానంద రెడ్డి కూడా పార్టీ అధిష్టానానికి విజ్ఢప్తి చేశారు. కాంగ్రెసు అధ్యక్షురాలు సోనియా గాంధీని కూడా కలిసి ఆ విషయం చెప్పారు. కానీ, నర్రెడ్డి రాజశేఖర రెడ్డి అభ్యర్థిత్వాన్ని పార్టీ అధిష్టానం ఇష్టపడలేదని అంటున్నారు.

వైయస్ జగన్‌పై నర్రెడ్డి రాజశేఖర రెడ్డి బలమైన అభ్యర్థి కాబోరని కాంగ్రెసు నాయకత్వం భావించినట్లు తెలుస్తోంది. నిజానికి మంత్రి డిఎల్ రవీంద్రా రెడ్డిని పోటీకి దించాలని అధిష్టానం భావించింది. కానీ ఆయన అందుకు సుముఖంగా లేరు. దీంతో ఎమ్మెల్సీ ఎన్నికల్లో జగన్ అభ్యర్థిపై ఓడిపోయిన వరదరాజులు రెడ్డిని తెర మీదికి తెచ్చింది. అయితే, అనూహ్యంగా కందుల రాజమోహన్ రెడ్డి కూడా అభ్యర్థిగా ముందుకు రావచ్చునని అంటున్నారు. తెలుగుదేశం పార్టీ అధ్యక్షుడు చంద్రబాబు నాయుడిపై అసంతృప్తితో ఉన్న కందుల రాజమోహన్ రెడ్డి తన సోదరుడు కందుల శివానంద రెడ్డితో పాటు కాంగ్రెసులో చేరే ఆలోచనలో ఉన్నట్లు తెలుస్తోంది.

Published On April 6, 2011