వైయస్ జగన్ పార్టీలో కోవర్టులు?

By Pratap

Published: Sunday, October 30, 2011, 8:22 [IST]

వైయస్సార్ కాంగ్రెసు పార్టీ అధినేత వైయస్ జగన్మోహన్ రెడ్డికి కొత్త భయం పట్టుకుందని అంటున్నారు. వైయస్సార్ కాంగ్రెసు పార్టీలో కోవర్టులున్నారనే అనుమానాలు వ్యక్తమవుతున్నాయి. కాంగ్రెసుకు ఎప్పటికప్పుడు సమాచారం అందజేసే మనుషులు వైయస్సార్ కాంగ్రెసు పార్టీలో ఉన్నారట. రాజకీయానుభవం పెద్దగా లేని జగన్ వారిని గుర్తించడంలో విఫలమవుతున్నారని అంటున్నారు. పార్టీ వ్యూహప్రతివ్యూహాలను అటు తెలుగుదేశం పార్టీ అధ్యక్షుడు నారా చంద్రబాబునాయుడికి, ఇటు కిరణ్ కుమార్ రెడ్డికి కొంత మంది ఎప్పటికప్పుడు అందజేస్తున్నారని అంటున్నారు.

దానికితోడు, మరో విషయం కూడా వైయస్ జగన్‌కు ఇబ్బందికరంగానే మారిందని చెబుతున్నారు. ఇటీవల వైయస్ జగన్ జిల్లాలవారీ సమీక్షాసమావేశాలు నిర్వహించి సభ్యత్వ నమోదుకు టార్గెట్లు ఇచ్చారు. ఈ టార్గెట్లను పార్టీ నాయకులు పట్టించుకోవడం లేదనే విమర్శలు వినిపిస్తున్నాయి. వైయస్ జగన్ చరిష్మా మీద ఆధారపడి నెగ్గుకురావాలనే నాయకులే ఎక్కువ మంది ఉన్నారని, కష్టపడి పార్టీని బలోపేతం చేయాలని భావించేవారు తక్కువగా ఉన్నారని చెబుతున్నారు. ఈ స్థితిలో వైయస్సార్ కాంగ్రెసుకు ఇబ్బందులు తప్పవని చెవులు కొరుక్కుంటున్నారు.

Published On October 30, 2011