గాలి జనార్దన్ రెడ్డి ఖల్ నాయకా?

By Pratap

Published: Monday, November 28, 2011, 9:44 [IST]

గనుల అక్రమ తవ్వకాల కేసులో హైదరాబాదు జైల్లో మగ్గుతున్న గాలి జనార్దన్ రెడ్డిపై రామోజీ రావు నేతృత్వంలోని ఈనాడు దినపత్రిక గతాన్ని తవ్విపోస్తోంది. గాలి జనార్దన్ రెడ్డిని నిజ జీవితంలో ఖల్ నాయక్‌గా అభివర్ణిస్తూ సోమవారం ఓ వార్తాకథనాన్ని ప్రచురించింది. వైయస్ సర్కార జమానా వల్ల ఇటు ఆంధ్రప్రదేశ్‌లోనూ మంత్రి కావడం వల్ల అటు కర్ణాటకలోనూ గాలి జనార్దన్ రెడ్డి పట్టు సంపాదించారని రాశారు. తనకు ప్రీతిపాత్రమైన అధికారులను నియమించుకోగలిగారని అంటూ తనకు నచ్చని అధికారులను కష్టాల పాలు చేశాడని, వారిపై అక్రమ కేసులు బనాయించి ముప్పు తిప్పలు పెట్టి మూడు చెరువుల నీళ్లు తాగించారని ఈనాడు దినపత్రిక రాసింది.

గాలి జనార్దన్ రెడ్డి చేతిలో తిప్పలు పడినవారి వివరాలను ఇచ్చింది. ఓబుళాపురం మైనింగ్ కంపెనీ (ఒఎంసి) మాజీ జనరల్ మేనేజర్ ఆంజనేయలు గాలి ఆగడాలను తట్టుకోలేక నిద్ర మాత్రలు మింగి ఆత్మహత్యా యత్నానికి కూడా పాల్పడినట్లు ఆ పత్రిక రాసింది. అచ్చం సినిమాల్లో లాగా గాలి జనార్దన్ రెడ్డి ఆంజనేయులు పంజా విసిరిన విషయాన్ని ఈనాడు దినపత్రిక వివరించింది. గాలి అక్రమాలపై పోరాడుతున్న తపాలా గణేష్‌పై గాలి జనార్దన్ రెడ్డి హత్యాయత్నం చేసినట్లు ఆరోపణలున్నాయి. పైగా, తపాలా గణేష్‌పైనే హత్యాయత్నం కేసు నమోదు చేసేందుకు రంగం సిద్ధమైనట్లు చెబుతున్నారు. ఏమైనా, గాలి జనార్దన్ రెడ్డి పాప ఫలితం అనుభవిస్తున్నారనే మాట ప్రత్యర్థుల నుంచి వినిపిస్తోంది.

Published On November 28, 2011