'సిల్క్ స్మిత'ను సొమ్ము చేసుకుంటున్న ఏక్తా!

By Srinivas

Published: Sunday, July 31, 2011, 13:50 [IST]

నిన్న మొన్నటి వరకు క్యోంకీ సాస్ బి కబీ బహుతీ, కహానీ ఘర్ ఘర్ కీ, కసమ్ సే తదితర అత్తా కోడళ్ల తగవులు, సవతుల మధ్య గొడవలు వంటి సీరియల్సు తీస్తూ వచ్చిన నిర్మాత ఏక్తా కపూర్ ఆ తర్వాత బాలీవుడ్‌లోకి ఎంటరై క్యోంకి, కుచ్ తో హాయ్, క్రిష్ణా కాటేజ్ వంటి పలు సినిమాలు తీసి చేతులు కాల్చుకుంది. దీంతో ఆమె తక్కువ ఖర్చుతో ఎక్కువ లాభాలు పండించే బూతు సినిమాలపై దృష్టి పెట్టినట్లుగా కనిపిస్తోంది. అందులో భాగంగానే ఇటీవల రాగిణి ఎమ్మెమ్మెస్ అనే చిత్రాన్ని తీసింది. ఇప్పుడు తాజాగా తెలుగు, తమిళ, కన్నడ భాషల్లో ప్రత్యేక పాటల్లో ఓ వెలుగు వెలిగిన సిల్క్ స్మిత చిత్రాన్ని డర్టీ పిక్చర్‌గా నిర్మిస్తోంది.

బాలీవుడ్‌లోనూ ప్రత్యేక పాటల్లో నర్తించే వారు ఉన్నప్పటికీ ఏక్తా కపూర్‌కు ఉత్తరాదిన ఏమాత్రం పరిచయం లేని దక్షిణాది సిల్క్ స్మిత జీవిత గాథని చిత్రంలో తీయడంలోని ఆంతర్యం ఏమంటే ఈ చిత్రం కూడా రాగిని ఎమ్మెమ్మెస్ చిత్రంలా తక్కువ ఖర్చుతో తీయవచ్చు. అంతేకాదు దక్షిణాదిన సిల్క్ స్మితకు ఉన్న క్రేజ్ కారణంగా తెలుగు, తమిళ, కన్నాడ భాషలలో విడుదల చేయడం ద్వారా ఇక్కడే ఆ సినిమాకు అయిన ఖర్చు కంటే ఎక్కువ వసూళ్లు రాబట్టుకోవచ్చు. ఇక సిల్క్ స్మితకు దక్షిణాదిన ఉన్న క్రేజ్‌ని సినిమా విడుదలకు ముందే ఉత్తరాదిన ప్రచారం చేసి ఆ తర్వాత చిత్రం విడుదల చేయడం ద్వారా భారీగా కాసులు రాలుతాయని భావిస్తోందంట. హిందీలో వ్యాంప్ పాత్రలు ధరించిన వారు చాలామంది ఉన్నప్పటికీ స్మిత జీవిత చరిత్రని చిత్రంగా తీసి కాసులు రాబట్టుకుందామనుకోవడాన్ని పలువురు ప్రశ్నిస్తున్నారు.

Published On July 31, 2011